ہریانہ واقع سرسا میں شادی کے فوراً بعد دولہا-دلہن نے کورونا ٹیسٹ کرانے کا فیصلہ لیا۔ دونوں اس کے لیے سول سرجن ڈاکٹر سریندر نین کے پاس پہنچے جنھوں نے میڈیا کو بتایا کہ ”ایک خاتون جو پنجاب سے ہے، اس کی شادی یہاں ایک گاؤں میں ہوئی ہے، دونوں یہاں جانچ کرانے آئے اور جانچ کرا کے گئے ہیں۔“
Published: 25 May 2020, 12:40 PM IST
میڈیا ذرائع سے موصول ہو رہی خبروں کے مطابق احمد آباد سول اسپتال کی ایک نرس نے مبینہ طور پر خودکشی کر لی ہے۔ بتایا جاتا ہے کہ نرس نے اپنے والدین کے فلیٹ میں دسویں منزل سے چھلانگ لگا دی جس سے اس کی موت واقع ہو گئی۔ یہ فلیٹ نیو منی نگر علاقہ میں موجود ہے۔ خودکشی کے اسباب کا فی الحال کوئی پتہ نہیں چل سکا ہے۔
Published: 25 May 2020, 12:40 PM IST
کورونا بحران کے سبب لوگوں کے سامنے بے شمار مسائل کھڑے ہو گئے ہیں۔ اس کو دیکھتے ہوئے کانگریس نے 28 مئی کو پارٹی کے ذریعہ ریاستوں میں ایک آن لائن مہم شروع کرنے کا فیصلہ کیا ہے۔ اس مہم کے ذریعہ حکومت سے انکم ٹیکس دائرہ سے باہر کے سبھی کنبوں کو 10 ہزار روپے کی رقم ڈائریکٹ اکاؤنٹ میں منتقل کرنے کا مطالبہ کیا جائے گا۔
Published: 25 May 2020, 12:40 PM IST
غازی آباد کے ضلع مجسٹریٹ نے ضلع میں بڑھتے ہوئے کورونا انفیکشن کی وجہ سے دہلی-غازی آباد بارڈر کو ایک بار پھر سیل کرنے کا حکم جاری کر دیا ہے۔ صرف ایسے لوگوں کو ہی غازی آباد سرحد میں داخل ہونے کی اجازت ہوگی جو ’پاس‘ بنائے ہوئے ہیں۔ علاوہ ازیں ضروری خدمات سے متعلق لوگوں کو بھی سرحد میں داخل ہونے کی چھوٹی ہوگی۔ اس سے قبل لاک ڈاؤن 2 کے دوران بھی اس بارڈر کو سیل کر دیا گیا تھا۔
Published: 25 May 2020, 12:40 PM IST
ملک میں دو ماہ بعد گھریلو فضائی خدمات کی بحالی کے ساتھ ہی سری نگر اور جموں کے ہوائی اڈوں پر بھی پیر کے روز صبح سے ہی ملازمین و مسافرین کی گہماگہمی بحال ہوئی۔ واضح رہے کہ جموں وکشمیر کے ہوائی اڈوں پر کورونا وائرس کی روک تھام کے پیش نظر 25 مارچ کو ہوائی سفر خدمات کا سلسلہ معطل کیا گیا تھا۔
ذرائع نے بتایا کہ باہر سے آنے والے مسافروں کے مخصوص کاؤنٹروں پر کورونا ٹیسٹ کے نمونے حاصل کئے گئے اور انہیں انتظامی قرنطینہ میں رکھا گیا۔ انہوں نے بتایا کہ مسافروں کو قرنطینہ مراکز سے ٹیسٹ رپورٹ منفی آنے کے بعد ہی اپنے اپنے گھروں کو جانے کی اجازت دی جائے گی۔ تاہم جن کی رپورٹ مثبت آئے گی انہیں علاج کے لئے ہسپتال منتقل کیا جائے۔
Published: 25 May 2020, 12:40 PM IST
راجستھان میں ٹڈیوں کا قہر جاری ہے۔ سوش میڈیا پر ایک ویڈیو سامنے آیا ہے جس کے مطابق 24 مئی کی دیر رات جے پور کے دیہی علاقے میں ٹڈیوں نے دستک دی اور آج یعنی 25 مئی کی صبح جے پور شہر کے کئی علاقوں سے گزرتی ہوئی دوسہ کی طرف نکل گئی۔
Published: 25 May 2020, 12:40 PM IST
ہندوستان کی کئی ریاستوں میں اس وقت گرمی کی شدید لہر چل رہی ہے۔ خصوصی طور سے دہلی اور راجستھان میں کئی مقامات پر درجہ حرارت 45 ڈگری سلسیس کے اوپر چلا گیا ہے۔ راجستھان کے دھول پور میں ایک شخص نے میڈیا سے بات چیت کرتے ہوئے کہا کہ ”گرمی سے بچنے کے لیے میں اپنے چہرے کو کپڑے سے ڈھک کر اپنے گھر سے باہر نکل رہا ہوں اور پانی، لسّی اور گنّے کا جوس زیادہ سے زیادہ پی رہا ہوں۔“
Published: 25 May 2020, 12:40 PM IST
ہندوستان کی دیگر ریاستوں کی طرح تلنگانہ میں بھی عید کی نماز کسی عیدگاہ یا مسجد میں نہیں پڑھائی گئی بلکہ لوگوں نے اپنے اپنے گھروں میں ہی نماز ادا کی۔ حیدر آباد کی مشہور مکہ مسجد بھی اس درمیان بند رہی جس کی کچھ تصویریں سوشل میڈیا پر سامنے آئی ہیں۔ تصویروں میں مکہ مسجد میں پسرا سناٹا صاف دکھائی دے رہا ہے۔
Published: 25 May 2020, 12:40 PM IST
دہلی، بہار، مغربی بنگال، یو پی، مہاراشٹر، کرناٹک سمیت ملک کی مختلف ریاستوں میں آج عید کا تہوار منایا جا رہا ہے۔ لاک ڈاؤن کی وجہ سے کہیں بھی عیدگاہ یا مسجد میں نماز نہیں پڑھائی گئی بلکہ لوگوں نے گھروں میں ہی باجماعت نماز ادا کی۔ راجدھانی دہلی کے جامع نگر کی کئی تصویریں اور ویڈیوز سامنے آئی ہیں جن میں 7-5 لوگ گھر میں ہی جماعت بنا کر عید کی نماز پڑھتے ہوئے نظر آ رہے ہیں۔
Published: 25 May 2020, 12:40 PM IST
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
Published: 25 May 2020, 12:40 PM IST