’جموں و کشمیر ہمارا تھا اور رہے گا‘، اقوام متحدہ میں ہندوستان کا پاکستان کو دو ٹوک

اقوام متحدہ کی سلامتی کونسل میں ’لیڈرشپ فار پیس‘ کے موضوع پر ہوئی کھلی بحث کے دوران ہندوستان نے پاکستان کو دو ٹوک جواب دیا۔ اقوام متحدہ میں ہندوستان کے مستقل نمائندے سفیر ہریش پی نے واضح الفاظ میں کہا کہ ’’جموں و کشمیر اور لداخ ہندوستان کے اٹوٹ اور لازمی حصے ہیں اور رہیں گے۔‘‘ ساتھ ہی انہوں نے دہشت گردی کے مسئلہ پر کسی بھی طرح کے سمجھوتے سے انکار کرتے ہوئے پاکستان پر سنگین الزام عائد کیے۔

ہندی نیوز پورٹل ’اے بی پی نیوز‘ پر شائع خبر کے مطابق سفیر ہریش پی نے پاکستان کے نمائندہ کے بیان کا جواب دیتے ہوئے کہا کہ ’’جموں و کشمیر اور لداخ ہندوستان کے اٹوٹ اور ناقابل تقسیم حصہ ہیں۔ یہ پہلے بھی ہندوستان کا حصہ تھے آج بھی ہیں اور ہمیشہ رہیں گے۔‘‘ ہندوستان نے واضح کیا کہ پاکستان کے ذریعہ اس مسئلہ کو بارہا بین الاقوامی فورمز پر اٹھانا اس کی ہندوستان مخالف ذہنیت کی عکاسی کرتا ہے۔

ہندوستان نے کہا کہ سلامتی کونسل کا ایک غیر مستقل رکن ہونے کے باوجود پاکستان ہر پلیٹ فارم کا استعمال ہندوستان اور اس کے لوگوں کو نقصان پہنچانے کے لیے کر رہا ہے۔ ہندوستانی سفیر کا کہنا ہےکہ ایسا ملک جو اپنی تقسیم کی سیاست کو آگے بڑھانے کے لیے اقوام متحدہ کے ہر پلیٹ فارم کا غلط استعمال کرتا ہے۔ اس سے اپنی ذمہ داریوں اور فرائض کو پورا کرنے کی توقع نہیں کی جا سکتی۔

ہندوستان نے 65 سال قبل سندھ طاس معاہدہ کو خیر سگالی اور دوستی کے جذبے سے قبول کیا تھا، لیکن پاکستان نے اس کے باوجود ہندوستان کے خلاف 3 جنگیں کیں اور ہزاروں دہشت گردانہ حملے کیے۔ ہندوستان کا یہ بھی کہنا ہے کہ پاکستان نے دہائیوں تک اس معاہدے کے روح کی خلاف ورزی کی ہے۔ ہندوستان کا کہنا ہے کہ پاکستان کی سرپرستی میں ہونے والی دہشت گردی کے سبب گزشتہ 4 دہائیوں میں ہزاروں ہندوستانیوں کی جانیں تلف ہوئی ہیں۔ اس کی تازہ ترین مثال رواں سال اپریل 2025 میں پہلگام میں ہونے والا دہشت گردانہ حملہ ہے، جس میں 26 بے گناہ ہندوستانی شہری مارے گئے تھے۔

ہندوستانی سفیر ہریش پی نے پاکستان کی جمہوری حالت پر بھی سوال اٹھایا۔ انہوں نے کہا کہ پاکستان میں وزیراعظم کو جیل میں ڈالا جاتا ہے، حکمراں سیاسی جماعت پر پابندی عائد کی جاتی ہے اور فوج آئینی ترامیم کے ذریعے اقتدار پر قبضہ کرتی ہے۔ ہندوستان نے آخر میں واضح طور پر کہا کہ وہ پاکستان کی سرپرستی میں ہونے والی دہشت گردی اور اس کی تمام شکلوں کا بھرپور طریقے سے مقابلہ کرے گا۔ ہندوستان نے اس بات کا اعادہ کیا کہ دہشت گردی پر کوئی سمجھوتہ نہیں ہوگا اور قومی سلامتی سے متعلق معاملات پر اس کا موقف مضبوط رہے گا۔