حج 2019۔ LIVE: بیس لاکھ سے زیادہ عازمین رکن اعظم وقوف کیلئے میدان عرفات پر جمع

حج 2019 اس وقت شباب پر ہے اور بیس لاکھ سے زیادہ عازمین عرفات کے میدان میں جمع ہو گئے ہیں۔ سعودی عرب میں فریضہ حج کی ادائیگی کے لیے دنیا بھر سے آئے لاکھوں عازمین کی منیٰ سے میدان عرفات پہنچے ہیں۔ گزشتہ روز منیٰ میں قیام کے بعد عازمین آج صبح یعنی 9 ذی الحجہ سے میدان عرفات کے لئے روانہ ہوئے، ہیں جہاں انہیں حج کا رکن اعظم وقوف عرفہ ادا کرنا ہے۔ وقوف عرفہ کے دوران مسجد نمرہ میں خطبہ حج ہوگا جس کے بعد نماز ظہر اور عصر ایک ساتھ ادا کی جائے گی۔

ایک طرف فرزندانِ توحید حج کے مناسک پورے کرنے میں مصروف ہیں اور دوسری طرف پوری دنیا سے ان عازمین حج کے لیے دعائیں اور نیک خواہشات کا سلسلہ جاری ہے۔ خصوصاً سوشل میڈیا پر عازمین حج کی خیر و عافیت کے لیے خوب دعائیں ہو رہی ہیں۔

ایک طرف عازمین حج کے عرفات پہنچنے کا سلسلہ جاری ہے اور سعودی میڈیا کے مطابق 20 لاکھ سے زائد فرزندانِ توحید اب تک عرفات پہنچ چکے ہیں۔ اس درمیان مسجد الحرام میں غلاف کعبہ تبدیل کرنے کا عمل بھی پورا ہو گیا ہے۔ اس کی تصویریں سوشل میڈیا پر وائرل بھی ہو رہی ہیں۔

لاکھوں فرزندان توحید اس وقت مناسکِ حج میں مصروف ہیں اور سنت ابراہیمی کی یاد تازہ کر رہے ہیں۔ لبیک اللہم لبیک کے فلک شگاف نعرے چاروں طرف گونج رہے ہیں۔ اس مرتبہ سعودی عربیہ اور ارب نیوز نے پہلی بار خاتون کوریج ٹیم متعارف کرایا ہے۔ عرب نیوز کے ایڈیٹر ان چیف فیصل عباس نے اس سلسلے میں خاتون ٹیم کے لیے نیک خواہشات پیش کی ہیں اور انھوں نے کہا کہ ’’آپ نے ہمیں فخر کا موقع فراہم کیا ہے۔‘‘