’کب جاگے گی یہ حکومت؟ آخر کب تک اپنوں کی لاشیں گنتا رہے گا منی پور؟‘ 2 معصوم بچوں کے قتل پر کانگریس کا سخت ردعمل

منی پور میں ایک بار پھر تشدد پھوٹ پڑا ہے، تازہ واقعہ میں گھر میں سوتی ہوئی ماں اور اس کے 2 بچے پر راکیٹ سے حملہ ہوا۔ اس حملہ میں دونوں بچوں کی موت ہو گئی اور خاتون شدید طور پر زخمی ہو گئی ہے۔ تشدد کے اس تازہ ترین واقعہ پر کانگریس کا سخت ردعمل سامنے آیا ہے۔ سوشل میڈیا پلیٹ فارم ’ایکس‘ پر کانگریس نے لکھا کہ ’’منی پور میں بی ایس ایف جوان کے گھر میں 2 معصوم بچوں کو بے رحمی سے قتل کر دیا گیا۔ 3 سال بعد بھی منی پور تشدد کی آگ میں جھلس رہا ہے، لیکن بے حس ہو چکی مودی حکومت کو کوئی فرق نہیں پڑ رہا ہے۔‘‘

کانگریس نے اپنے آفیشل ’ایکس‘ ہینڈل پر مزید لکھا کہ ’’آج منی پور کو امن کی ضرورت ہے، جس کے لیے حکومت کو ٹھوس قدم اٹھانے ہوں گے۔ صرف کھوکھلی بیان بازی اور دکھاوے کے سرکاری دورے سے لوگوں کے زخم نہیں بھرنے والے ہیں اور نہ ہی ان کی پریشانیاں ختم ہونے والی ہیں۔‘‘ کانگریس نے وزیر اعظم مودی کو ان کی ذمہ داری یاد دلاتے ہوئے لکھا کہ ’’نریندر مودی جی وزیر اعظم ہونے کے ناطے منی پور میں امن بحال کرنا آپ کی اخلاقی ذمہ داری ہے۔ اپنی ذمہ داری سے مت بھاگیے، ورنہ تاریخ آپ کو معاف نہیں کرے گی۔‘‘

لوک سبھا میں حزب اختلاف کے قائد راہل گاندھی نے بھی سوشل میڈیا ایکس پر منی پور کے حوالے سے پوسٹ کیا۔ انہوں نے لکھا کہ ’’منی پور میں بی ایس ایف جوان کے گھر میں سوتے 2 معصوم بچوں کے قتل کی خبر دل کو چیر دینے والی ہے۔ منی پور میں تشدد کی دہکتی ہوئی آگ میں آج 3 سال بعد بھی بے قصور بچے جھلس رہے ہیں۔ دور دور تک امن و امان کی کوئی صورت نظر نہیں آتی۔ مودی حکومت اس قدر بے حس اور پتھر دل ہوئی گئی ہے کہ مانو یہ بھول چکی ہے کہ منی پور کے بچے بھی ملک کے بچے ہیں، ہمارا مستقبل ہیں۔‘‘

راہل گاندھی نے پوسٹ میں مزید لکھا کہ ’’کب جاگے گی یہ حکومت؟ آخر کب تک اپنوں کی لاشیں گنتے گنتے منی پور کرتا رہے گا انتظار؟ میں بار بار کہتا آیا ہوں، امن ہی واحد راستہ ہے۔ تمام برادریوں کو ساتھ لا کر، حساسیت کے ساتھ ہی اس بحران کا مستقل حل نکالا جا سکتا ہے۔‘‘ کانگریس لیڈر نے آگے لکھا کہ ’’وزیر اعظم جی، منی پور صرف ایک ریاست نہیں ہے بلکہ ایک ذمہ داری ہے۔ صرف نام کا ایک بیان کافی نہیں، صرف دکھاوے کا ایک دورہ کافی نہیں۔ آپ کو ٹھوس اور فوری قدم اٹھانے ہی ہوں گے۔ اس سے پہلے کے حالات مکمل طور پر کنٹرول سے باہر ہو جائے۔‘‘