حج 2026 کے انتظامات سے متعلق جائزہ اجلاس اور حج کیمپ کی جگہ کا معائنہ

نئی دہلی: جیسے جیسے مقدس حج 2026 کے لیے عازمین حج کی روانگی کا وقت قریب آ رہا ہے، ویسے ویسے حج سے متعلق انتظامات کو یقینی بنانے کے لیے مختلف سطحوں پر کام اور اجلاس کا سلسلہ بھی شروع ہو چکا ہے۔ اسی سلسلے میں دہلی اسٹیٹ حج کمیٹی کے زیر اہتمام 18 اپریل سے اندرا گاندھی انٹرنیشنل ایئرپورٹ، ٹرمینل-3 سے شروع ہونے والی حج پروازوں سے قبل، دہلی اسٹیٹ حج کمیٹی کی چیئرپرسن کوثر جہاں کی صدارت میں حج انتظامات کے جائزے کے لیے ایک اہم اجلاس منعقد ہوا۔

اس اجلاس میں دہلی کے مختلف متعلقہ محکموں مثلاً ایم سی ڈی، دہلی پولیس، دہلی اربن شیلٹر امپروومنٹ بورڈ، دہلی جل بورڈ، سول ڈیفنس وغیرہ کے افسران نے شرکت کی۔ اس سے قبل سنٹرل دہلی کے ایڈیشنل ڈی سی پی رشی سنگھ، آئی پی ایس کے ہمراہ دہلی کے مشہور رام لیلا میدان میں عازمین حج کے لیے قائم کیے جانے والے حج کیمپ کی جگہ کا معائنہ بھی کیا گیا اور وہاں جاری تیاریوں و انتظامات کا جائزہ لیا گیا۔

اس اجلاس میں دہلی اسٹیٹ حج کمیٹی کے ایگزیکٹیو آفیسر جناب اشفاق احمد عارفی، ڈپٹی ایگزیکٹو آفیسر جناب محسن علی اور حج کمیٹی کے متعلقہ عملے نے بھی شرکت کی۔ اشفاق احمد عارفی نے حج سے متعلق معلومات فراہم کرتے ہوئے بتایا کہ اس سال دہلی سے 3226 عازمین حج مقدس سفر حج پر روانہ ہوں گے، جبکہ دہلی امبارکیشن پوائنٹ سے شمالی ہند کے تقریباً 22000 عازمین حج، دہلی اسٹیٹ حج کمیٹی کی نگرانی و سرپرستی میں مقدس حج کے لیے روانہ ہوں گے۔ ان تمام عازمین حج کے لیے دہلی اسٹیٹ حج کمیٹی کی جانب سے حج کیمپ اور دہلی ایئرپورٹ تک آمد و رفت کی سہولت بھی فراہم کی جاتی ہے۔