دہلی کے موسم پر ویسٹرن ڈسٹربینس کا پڑنے والا ہے اثر، کئی مقامات پر بارش کے آثار

قومی راجدھانی دہلی کے موسم پر اگلے دو دنوں میں ویسٹرن ڈسٹربینس کا اثر دیکھنے کو مل سکتا ہے۔ اس کی وجہ سے پیر کو الگ الگ مقامات پر ہلکی بارش ہو سکتی ہے۔ اس سے زیادہ سے زیادہ درجہ حرارت میں گراوٹ کا امکان ہے۔ دہلی کے اسٹینڈرڈ آبزرویٹری صفدر جنگ میں ہفتہ کا زیادہ سے زیادہ درجہ حرارت 3.9 ڈگری سیلسیس درج کیا گیا۔

محکہ موسمیات کے اندازہ کے مطابق اتوار کی صبح بھی ہلکے سے درمیانی سطح کا کہرا چھائے رہنے کا امکان ہے۔ دن میں ہوا کی رفتار 4 سے 8 کلومیٹر فی گھنٹہ تک کی رہے گی۔ زیادہ سے زیادہ درجہ حرارت 23 سے 25 ڈگری سیلسیس تک اور کم سے کم درجہ حرارت 8 سے 10 ڈگری سیلسیس کے بیچ رہنے کا امکان ہے۔

ویسے دہلی کے زیادہ تر علاقوں میں ہفتہ کی صبح گھنا کہرا دیکھنے کو ملا۔ صبح کے وقت گھنے کہرے کی وجہ سے صفدر جنگ اور پالم موسمیات مراکز میں حد نگاہ کی سطح صفر سے 50 میٹر تک گر گئی۔ اس دوران ہوا کی رفتار رک جانے سے کہرا زیادہ دیر تک قائم رہا۔ صبح 10 بجے کے بعد کہرا کم ہونے لگا اور دھوپ نکل آئی۔ حالانکہ دن بھر ہلکی دھند چھائی رہی۔

دہلی کے صفدر جنگ موسمیات مرکز میں دن کا زیادہ سے زیادہ درجہ حرارت 26.2 ڈگری سیلسیس تک درج کیا گیا جو معمول سے 3.9 ڈگری سیلسیس زیادہ ہے۔ کم سے کم درجہ حرارت 10.2 ڈگری سیلسیس رہا، یہ معمول سے 1.8 ڈگری سیلسیس زیادہ ہے۔ نمی کی سطح 100 سے 51 فیصد تک رہی۔

وہیں راجدھانی کے لوگوں کو ابھی آلودہ ہوا سے راحت ملتی ہوئی نہیں دکھائی دے رہی ہے۔ دہلی کے دو علاقوں کا اے کیو آئی ہفتہ کو 400 کے پار یعنی سنگین زمرے میں پہنچ گیا۔ اگلے دو دن کے درمیان بھی ہوا کا معیار اسی سطح کے آس پاس رہنے کا امکان ہے۔ موسم کی الگ الگ وجوہات سے دہلی کے لوگوں کو مسلسل آلودہ ہوا میں سانس لینے پر مجبور ہونا پڑ رہا ہے۔