’ووڈافون آئیڈیا‘ نے ریچارج کی قیمتوں میں کیا اضافہ، ایئرٹیل سے زیادہ مہنگے ہوئے کچھ پلان

اگر آپ ووڈافون آئیڈیا کے صارف ہیں تو آپ کے جیب پر بوجھ پڑنے والا ہے۔ ووڈافون آئیڈیا نے اپنے صارفین کو جھٹکا دیتے ہوئے کچھ فیملی پوسٹ پیڈ پلانس کی قمیتوں میں اضافہ کر دیا ہے۔ کمپنی نے ان پلانس کی قیمت تقریباً 7 سے 9 فیصد تک بڑھائے ہیں۔ خاص بات یہ ہے کہ یہ وہی پلانس ہیں جو اب تک ’بھارتی ایئرٹیل‘ کے مقابلے تقریباً یکساں قیمت پر حاصل ہو رہے تھے۔ نئی قیمتوں کے بعد ’وی آئی‘ کے یہ پیک اب ایئرٹیل سے زیادہ مہنگے ہو گئے ہیں۔

ووڈافون آئیڈیا کا 701 روپے والا فیملی پوسٹ پیڈ پلان جس میں 2 کنیکشن ملتے تھے، اب 751 روپے کا ہو گیا ہے۔ اسی طرح 4 کنیکشن والا 1201 روپے کا پلان بڑھ کر 1301 روپے کا ہو گیا ہے۔ جبکہ 5 کنیکشن کے لیے ملنے والا 1401 روپے کا پلان اب 1525 روپے میں ملے گا۔ ان تمام پلانس کی قیمتوں میں اضافے کا اثر براہ راست ان فیملیوں پر پڑے گا جو ایک ہی بل میں کئی نمبر چلاتے ہیں۔

واضح رہے کہ ووڈافون آئیڈیا کے ان فیملی پوسٹ پیڈ پلانس کو پہلے بھارتی ایئرٹیل کے پلانس کے برابر مانا جاتا تھا، خاص طور پر فی جی بی چارج کے معاملے میں۔ لیکن قیمتوں میں اضافے کے بعد ووڈافون آئیڈیا کے یہی پلانس اب ایئرٹیل کے مقابلے تقریباً 7 سے 9 فیصد زیادہ مہنگے ہو گئے ہیں۔ ایسے میں جو صارف صرف قیمت کی بنیاد پر وی آئی کو ترجیح دیتے تھے، ان کے لیے اب فیصلہ لینا مشکل ہو سکتا ہے۔

پوسٹ پیڈ صارفین کے لیے یہ اضافہ براہ راست ماہانہ اخراجات کو بڑھانے والا ہے۔ فیملی پلان کا مقصد عام طور پر کفایتی کنیکشن ہوتا ہے، لیکن قیمت میں اضافے سے یہ فائدہ کچھ حد تک کم ہو سکتا ہے۔ ٹیلی کام سیکٹر میں پہلے ہی مہنگے ٹیرف کو لے کر بحث چل رہی ہے۔ ایسے میں ووڈافون آئیڈیا کا یہ پلان صارفین کو ایئرٹیل یا دیگر متبادل پر غور کرنے کے لیے مجبور کر سکتا ہے۔