ممبئی حج ہاؤس میں یو پی ایس سی کوچنگ پھر ہوئی شروع، عمران پرتاپ گڑھی کی کوششیں رنگ لائیں

ممبئی: راجیہ سبھا میں کانگریس کے رکن عمران پرتاپ گڑھی کی کوششیں رنگ لائیں اور بالآخر تقریباً 2 برس بند رہنے کے بعد ممبئی حج ہاؤس میں چلنے والی مفت رہائشی یوپی ایس سی کوچنگ پھر سے شروع ہو گئی ہے۔ وزارت برائے اقلیتی امور کے ماتحت حج کمیٹی آف انڈیا نے اس سے متعلق باقاعدہ نوٹیفکیشن بھی جاری کر دیا ہے اور خواہش مند طلبا سے اس کے لیے درخواستیں طلب کی گئی ہیں۔

واضح ہو کہ یو پی ایس سی اور دیگر ریاستی سول سروسز امتحانات کے خواہشمند طلبا کے لیے ممبئی حج ہاؤس میں حج کمیٹی کے ذریعہ 2009 سے فری ریزیڈنشیل یو پی ایس سی کوچنگ چلائی جا رہی تھی۔ اس میں منتخب طلبا کو مفت کوچنگ کے ساتھ ساتھ ہاسٹل کی سہولت بھی فراہم کی جاتی تھی۔ سروسز کے امتحانات دینے والے بالخصوص غریب طلبا اس کوچنگ سے کافی مستفید ہوئے اور اس کے قیام کے بعد سے تقریباً 25 طلبا یو پی ایس سی میں منتخب ہوئے اور 150 کے قریب نے ریاستی اور دیگر سرکاری ملازمتوں میں کامیابی حاصل کی۔

کوچنگ کی اس شاندار حصولیابی کے باوجود موجودہ حکومت نے اسے کورونا وبا اور دیگر وجوہات کا حوالہ دے کر 2 برس قبل دسمبر 2023 میں بند کر دیا، جس کی کئی سیاسی و سماجی شخصیات نے کھلے طور پر مذمت کی۔ کانگریس رہنما عمران پرتاپ گڑھی نے آج سے تقریباً 2 ماہ قبل مارچ 2025 میں پارلیمنٹ کے بجٹ اجلاس کے دوران راجیہ سبھا میں اس موضوع کو پُرزور طریقے سے اٹھایا اور وزارت برائے اقلیتی امور سے سوال کیا کہ جب اسے ان کے پیسے سے نہیں چلایا جا رہا ہے تو حکومت کو اسے چلانے میں پریشانی کیا ہے؟ انہوں نے حکومت سے درخواست کی تھی کہ حاجیوں کے پیسے سے چلنے والی اس کوچنگ کو دوبارہ شروع کیا جائے۔

عمران پرتاپ گڑھی کی اس پرزور مانگ کے آگے آخرکار حکومت کو مجبور ہونا پڑا اور حج کمیٹی آف انڈیا نے اب اس کے لیے باضابطہ نوٹیفکیشن جاری کر درخواستیں طلب کی ہیں۔ حج کمیٹی کی جانب سے جاری کردہ نوٹیفکیشن میں کہا گیا ہے کہ حج ہاؤس ریزیڈنشیل کوچنگ انسٹی ٹیوٹ (ایچ ایچ آر سی آئی) 2026 کے سول سروسز امتحان (پری اور مینس) کے واسطے اہل امیدواروں سے مفت رہائشی کوچنگ (ہاسٹل کی سہولت کے ساتھ) طلب کرتا ہے۔ اس کے تحت 100 طلبا کو منتخب کیا جائے گا جس میں 80 فیصد سیٹیں مسلم طلبا کے لیے مختص ہیں جبکہ 20 فیصد ایس سی/ایس ٹی اور او بی سی سمیت دیگر اقلیتی برادریوں کے لیے ریزرو ہیں۔ درخواستیں جمع کرنے کی آخری تاریخ 21 جون 2025 ہے۔

کانگریس رہنما عمران پرتاپ گڑھی نے ممبئی حج ہاؤس کوچنگ کے پھر سے شروع ہونے پر اپنی خوشی کا اظہار کیا ہے اور امید ظاہر کی ہے کہ اس سے اب پھر شاید بچوں کی امیدوں کو پرواز ملے گی۔ انہوں نے سوشل میڈیا پلیٹ فارم پر اپنی خوشی ظاہر کرتے ہوئے لکھا ہے کہ:

میں راہ کا چراغ ہوں سورج تو نہیں ہوں

جتنی میری بساط ہے کام آ رہا ہوں میں