دہلی کے اولڈ راجندر نگر میں یو پی ایس سی امیدوار کی خودکشی، خودکشی نوٹ برآمد

قومی راجدھانی دہلی کے اولڈ راجندر نگر میں یو پی ایس سی امیدوار کی خودکشی کا معاملہ سامنے آیا ہے۔ مرنے والے کی شناخت جموں کے رہنے والے 25سالہ ترون ٹھاکر کے طور پر کی گئی ہے۔ امیدوار کی لاش پنکھے سے لٹکی ہوئی ملی۔ موقع سے ایک مبینہ  خودکشی نوٹ برآمد ہوا ہے۔ نوٹ میں مقتول نے خود کشی کی ذمہ داری قبول کی اور کسی پر الزام نہیں لگایا۔ ایجنسی کے مطابق ایک سینئر پولیس افسر نے بتایا کہ 'کمرے سے ایک خودکشی نوٹ بھی برآمد ہوا ہے، جس میں اس نے لکھا ہے کہ وہ اپنی موت کا ذمہ دار ہے'۔

پولس کے مطابق ہفتہ کی شام تقریباً 6.32 بجے راجندر نگر پولس اسٹیشن میں خودکشی کی اطلاع دینے والی پی سی آر کال آئی۔ ایک ٹیم فوری طور پر موقع پر پہنچ گئی۔ پولیس ٹیم کو ترون ٹھاکر کی لاش پنکھے سے چادر کے ساتھ لٹکی ہوئی ملی۔ ترون جموں کا رہنے والا تھا اور یہاں کرائے کے مکان میں رہ رہا تھا۔

یہ معاملہ اس وقت سامنے آیا جب ترون کے والد صبح سے ان سے رابطہ کرنے کی کوشش کر رہے تھے لیکن کوئی جواب نہیں ملا۔ اس کے بعد انہوں  نے ترون کے مالک مکان سے رابطہ کیا، جو مشترکہ بالکونی والے ساتھ والے کمرے سے دوسری منزل پر پہنچا اور ترون کو بند کمرے میں لٹکا ہوا پایا۔ اس کے بعد اس نے پولیس کو اطلاع دی۔

پولیس نے بتایا کہ گھر میں سات سنگل روم یونٹ ہیں، سبھی میں یو پی ایس سی کے امیدوار رہتے ہیں۔ موقع پر ترون کا موبائل فون ملا ہے اور گروگرام میں ا س کا بھائی رہتا ہے۔ پولیس نے بتایا کہ کرائم ٹیم کو بھی تفتیش کے لیے بلایا گیا ہے اور قانونی کارروائی جاری ہے۔ مزید تفتیش جاری ہے اور خودکشی کی اصل وجہ کا ابھی تک پتہ نہیں چل سکا ہے۔ (انپٹ بشکریہ نیوز پورٹل ’آج تک‘)