مرکزی داخلہ سیکریٹری نے جموں وکشمیر کی سیکورٹی صورتحال کا جائزہ لیا

مرکزی داخلہ سیکریٹری گووند موہن نے اتوار کو جموں میں سیکورٹی صورتحال کا ایک اعلیٰ سطحی میٹنگ کے دوران جائزہ لیا ۔معلوم ہوا ہے کہ کٹھوعہ میں تین عام شہریوں کی ہلاکت کے بعد جموں کی سیکورٹی صورتحال کا از سر نو جائزہ لیا گیا ہے ذرائع کا کہنا ہے کہ داخلہ سیکریٹری نے سیکورٹی ایجنسیوں کو ہدایت دی کہ سرگرم ملی ٹینٹوں اوران کے مدد گاروں کے خلاف بڑے پیمانے پر آپریشن شروع کیا جائے۔

اطلاعات کے مطابق کٹھوعہ کے بلاور میں تین عام شہریوں کی ہلاکت کے بعد داخلہ سیکریٹری اتوار کی صبح ہنگامی طورپر جموں پہنچے ۔ معلوم ہوا ہے کہ داخلہ سیکریٹری کی سربراہی میں منعقدہ میٹنگ کے دوران جموں وکشمیر کی سیکورٹی صورتحال کا جائزہ لیا گیا۔ ذرائع کے مطابق میٹنگ میں پولیس سربراہ نالین پربھات، فوج، سی آر پی ایف، بی ایس ایف اور انٹیلی جنس ایجنسیوں سے وابستہ سینئر آفیسران نے شرکت کی۔

باوثوق ذرائع نے بتایا کہ میٹنگ کے دوران پولیس سربراہ نالین پربھات نے داخلہ سیکریٹری کو پاور پوائنٹ پرزنٹیشن کے ذریعے جموںوکشمیر کی سیکورٹی صورتحال کے بارے میں جانکاری فراہم کی۔ذرائع کے مطابق پولیس سربراہ نے اس موقع پر کہا کہ جموں وکشمیر میں مجموعی طور پر حالات پوری طرح سے قابو میں ہے۔پولیس سربراہ نے مزید بتایا کہ جموں صوبے میں پنپ رہی ملی ٹینسی کو نیست و نابود کرنے کی خاطر سیکورٹی ایجنسیاں دن رات کام کر رہی ہے۔

اس موقع پر داخلہ سیکریٹری نے سیکورٹی ایجنسیوں کو ہدایت دی کہ جموں صوبے میں امن و امان میں رخنہ ڈالنے والے عناصر کے خلاف سخت کارروائی عمل میں لائی جائے۔انہوں نے آفیسران کو ہدایت دی کہ جموں صوبے میں سرگرم ملی ٹینٹوں اوران کے مدد گاروں کے خلاف چلائے جارہے آپریشنز میں شدت لائی جائے۔

دریں اثنا ذرائع نے بتایا کہ میٹنگ کے دوران جموں صوبے کے اونچے پہاڑی علاقوں میں دہشت گردوں کی موجودگی پر تشویش کا اظہار کیا گیا۔ انہوں نے کہاکہ بالائی علاقوں میں زیادہ تر دہشت گرد غیر ملکی ہیں اور شدید سردی کے دوران مقامی تعاون کے بغیر ان کا زندہ رہنا محال ہے۔

ذرائع کا کہنا ہے کہ میٹنگ کے دوران آفیسران کو بتایا گیا کہ مرکزی وزارت داخلہ کو کٹھوعہ، ادھم پور ، ڈوڈہ ، کشتواڑ، ریاسی ، راجوری اور پونچھ اضلاع کے بالائی علاقوں مین دہشت گردوں کی موجودگی کی اطلاعات پر سخت تشویش ہے ۔ ذرائع کے مطابق مرکزی داخلہ سیکریٹری نے دو الگ الگ میٹنگوں کے دوران جموں وکشمیر کی سیکورٹی صورتحال کا جائزہ لیا۔

ان میٹنگوں مین چیف سیکریٹری اتل ڈلو، جموں وکشمیر کے ہوم سیکریٹری چندراکر بھارتی، پولیس سربراہ نالین پربھات، ایڈیشنل ڈی جی سی آئی ڈی نتیش کمار، آئی جی پی جموں بھیم سنگھ ٹوٹی،آئی جی کشمیر وی کے بردی اور پولیس، فوج، بی ایس ایف اور سی آر پی ایف کے سینئر عہدیداروں نے شرکت کی۔