دہلی میٹرو میں غیر شائستہ حرکات کے دو واقعات، پلیٹ فارم پر پیشاب اور غیر ملکی خاتون سے بدسلوکی

نئی دہلی: قومی راجدھانی دہلی میں پبلک ٹرانسپورٹ کے نظام سے جڑے دو الگ الگ واقعات نے شہری احساس، سماجی تربیت اور خواتین کے تحفظ سے متعلق ایک بار پھر سوالات کھڑے کر دیے ہیں۔ دہلی میٹرو میں پیش آنے والے ان واقعات کی ویڈیوز اور بیانات سوشل میڈیا پر وائرل ہونے کے بعد عوامی سطح پر شدید بحث شروع ہو گئی ہے۔

پہلا واقعہ دہلی میٹرو کے ایک اسٹیشن کا ہے جہاں ایک نوجوان کو پلیٹ فارم پر شیشے کی ریلنگ کے قریب کھڑے ہو کر کھلے عام پیشاب کرتے ہوئے دیکھا گیا۔ یہ منظر وہاں موجود کسی مسافر نے موبائل فون میں ریکارڈ کر لیا، جس کے بعد ویڈیو سوشل میڈیا پر تیزی سے پھیل گئی۔

ویڈیو میں دیکھا جا سکتا ہے کہ جیسے ہی نوجوان کو یہ احساس ہوا کہ اس کی ویڈیو بنائی جا رہی ہے، وہ پیشاب ادھورا چھوڑ کر وہاں سے بھاگ نکلا۔ اس واقعے نے نہ صرف صفائی اور نظم و ضبط پر سوال اٹھایا بلکہ اس بات پر بھی تشویش پیدا کی کہ عوامی مقامات پر قوانین کی خلاف ورزی روکنے کے لیے نگرانی کس حد تک مؤثر ہے۔

دوسرا واقعہ ایک امریکی خاتون سے متعلق ہے جنہوں نے دہلی میٹرو میں اپنے ساتھ پیش آنے والی بدسلوکی کا تجربہ سوشل میڈیا پر بیان کیا۔ خاتون کے مطابق وہ میٹرو میں سفر کر رہی تھیں کہ ایک کم عمر لڑکے نے اپنی ماں اور بہن کے ساتھ تصویر کھنچوانے کے بہانے ان کے قریب آ کر پہلے کندھے پر ہاتھ رکھا اور پھر نامناسب طور پر جسم کو چھوا، جس کے بعد وہ ہنستا ہوا وہاں سے چلا گیا۔ خاتون کا کہنا ہے کہ جب انہوں نے احتجاج کیا تو لڑکے کے ساتھ موجود افراد نے اس حرکت کو معمولی قرار دیا اور ان کے ردعمل کو غیر ضروری بتایا۔

خاتون نے بتایا کہ وہ ہندوستان ایک دوست کی شادی میں شرکت کے لیے آئی تھیں، مگر اس واقعے کے بعد انہوں نے مستقبل میں دوبارہ ہندوستان آنے سے متعلق عدم تحفظ کا اظہار کیا ہے۔ ان کے بیان کے بعد خواتین کی سلامتی، سیاحوں کے تحفظ اور عوامی مقامات پر ذمہ دارانہ رویے سے متعلق سوالات زور پکڑ گئے ہیں۔

ان دونوں واقعات کے سامنے آنے کے بعد دہلی میٹرو ریل کارپوریشن نے بیان جاری کرتے ہوئے مسافروں کو درپیش تکلیف پر افسوس کا اظہار کیا اور کہا کہ اس طرح کی سرگرمیوں پر ضابطے کے تحت کارروائی کی جاتی ہے۔ ادارے نے مسافروں سے اپیل کی ہے کہ کسی بھی مشتبہ یا قابل اعتراض سرگرمی کی فوری اطلاع متعلقہ حکام یا ہیلپ لائن پر دیں تاکہ بروقت کارروائی ممکن ہو سکے۔