سردی سے بچنے کے لیے کمرے میں جلائی انگیٹھی، مراد آباد میں 2 بچوں کی موت، 3 کی حالت نازک

اترپردیش میں مراد آباد کے چھجلیٹ تھانہ علاقے میں سردی سے بچنے کے لیے کی گئی چھوٹی سی لاپرواہی ایک خاندان کے لیے جان لیوا ثابت ہوئی۔ کمرے میں چل رہی کوئلے کی انگیٹھی سے نکلی گیس کی وجہ سے 2 معصوم بچوں آئرہ اور آہل کی موت ہوگئی جبکہ خاندان کے 3 دیگر افراد کی حالت تشویشناک ہونے پرانہیں علاج کے ہائر سینٹرمنتقل کیا گیا ہے۔

اطلاعات کے مطابق جمعہ کی صبح جب کمرے کا دروازہ کافی دیر تک نہیں کُھلا تو پاس میں ہی سورہے بھتیجے نے کسی طرح دروازہ کھلوایا تو دیکھا کہ کمرے میں سبھی بیہوش پڑے تھے۔ آناً فاناً میں سبھی کو اسپتال لے جایاگیا جہاں ڈاکٹر نے بچوں کو مردہ قرار دے دیا۔ اس واقعہ سے اہل خانہ کہرام مچا ہوا ہے۔

بتایا جارہا ہے کہ چھجلیٹ کا رہنے والا جاوید ہریدوار ہائی وے پر پٹرول پمپ کے قریب چائے کی دکان لگاتا ہے۔ اس کا گھر دکان کے پیچھے کچھ ہی فاصلے پر واقع ہے۔ جمعرات کی رات جاوید اپنی بیوی شائستہ، بیٹوں شیفان، آہل اور بیٹی آئرہ کے ساتھ اپنے کمرے میں انگیٹھی جلا کرسوگئے۔ اگلے دن جمعہ کوعلی الصبح جب کافی دیربعد بھی جاوید کا کمرہ نہیں کھُلا تو ان کے بھتیجے عامر اور برادرنسبتی صلاح الدین نے دروازہ کھٹکھٹایا جس پر جاوید نے لڑکھڑاتے ہوئے کسی طرح کمرہ کھولا۔ وہ نیم بیہوشی کی حالت میں تھا اور پورے کمرے میں دھواں بھر ا ہوا تھا۔

کمرے کا منظر انتہائی دردناک تھا۔ بیوی شائستہ اور تینوں بچے بیڈ پر بے ہوش پڑے تھے۔ اہل خانہ نے انہیں فوری طور پر پرائیویٹ اسپتال پہنچایا۔ ڈاکٹروں نے آہل اور آئرہ کو مردہ قرار دے دیا، جب کہ باقی 3 کو ہائر سینٹر ریفر کر دیا گیا۔

اس سلسلے میں خاندان کے رکن غیاث الدین نے بتایا کہ خاندان کے باقی افراد کا علاج چل رہا ہے۔ اطلاع ملنے پر پولیس نے جائے وقوعہ پر پہنچ کر جانچ کی۔ ابتدائی تحقیقات کے مطابق حادثہ انگیٹھی سے نکلنے والی گیس کی وجہ سے دم گھٹنے سے پیش آیا۔ دریں اثناء معصوم بچوں کی موت سے اہل خانہ میں کہرام مچ گیا اور علاقے میں سوگ کی لہر دوڑ گئی۔