پارلیمنٹ پر حملہ کی برسی: وزیراعظم اور دیگر رہنماؤں کا شہداء پارلیمنٹ کو خراج تحسین

نئی دہلی: وزیراعظم نریندر مودی، صدر دروپدی مرمو اور دیگر سیاسی رہنماؤں نے 13 دسمبر 2001 کو پارلیمنٹ پر ہونے والے دہشت گرد حملے میں شہید ہونے والے جوانوں کو خراج تحسین پیش کیا۔

وزیراعظم مودی نے اپنے سوشل میڈیا ہینڈل پر کہا، "2001 کے پارلیمنٹ حملے میں شہید ہونے والے بہادر جوانوں کو سلام۔ ان کی قربانی ہمیشہ ہمیں اپنے فرائض کی انجام دہی کے لیے ترغیب دے گی۔ ہم ان کے حوصلے اور قربانی کے لیے ہمیشہ شکر گزار رہیں گے۔"

صدر دروپدی مرمو نے بھی پارلیمنٹ حملے میں شہید ہونے والے سپاہیوں کو یاد کیا اور کہا، "میں ان بہادر سپاہیوں کو خراج عقیدت پیش کرتی ہوں جنہوں نے 2001 میں پارلیمنٹ کی حفاظت کرتے ہوئے اپنی جان قربان کی۔ ان کا حوصلہ اور جذبہ خدمت ہمیں ہمیشہ متاثر کرتا رہے گا۔ ہم ان کے خاندانوں کے ساتھ ہیں اور ان کی یاد ہمیشہ زندہ رہے گی۔"

لوک سبھا اسپیکر اوم برلا نے بھی اپنے خیالات کا اظہار کرتے ہوئے کہا، ’’پارلیمنٹ کے اس مقدس مقام کی حفاظت میں جان دینے والے شہداء کو سلام۔ ان کا یہ جذبہ قوم کے لیے مشعل راہ رہے گا۔‘‘

کانگریس کے قومی صدر ملکارجن کھڑگے نے بھی شہیدوں کو یاد کرتے ہوئے کہا، "ہم ان بہادر سپاہیوں کو خراج عقیدت پیش کرتے ہیں جنہوں نے پارلیمنٹ کی حفاظت کے لیے اپنی جان دی۔ ان کی قربانی کبھی فراموش نہیں کی جا سکتی۔ ہم دہشت گردی کے خلاف اپنی جدوجہد کو مضبوطی سے جاری رکھیں گے۔"

واضح رہے کہ آج سے 23 سال قبل، 13 دسمبر 2001 کو پارلیمنٹ ہاؤس پر دہشت گردوں نے حملہ کیا تھا۔ اس حملے میں ہمارے جوانوں نے شجاعت اور حوصلے کا مظاہرہ کرتے ہوئے دہشت گردوں کے منصوبے کو ناکام بنایا، لیکن آٹھ بہادر سپاہی شہید ہو گئے۔