آج ہوئی بارش نے ایک بار پھر بی جے پی حکومت کی ناکامی کو بے نقاب کر دیا، ہر جگہ آبی جماؤ کا نظارہ: دیویندر یادو

دہلی کانگریس صدر دیویندر یادو نے کہا کہ آج محض 2 گھنٹے کی بارش میں دہلی کا دِل ’کناٹ پلیس‘ مکمل طور پر ڈوب گیا، اور وہاں سیلاب جیسا ماحول بن گیا۔ اس حالت نے بی جے پی کی ریکھا گپتا حکومت کی آبی جماؤ سے نمٹنے کی کوششوں اور نالوں کی صفائی کے دعووں کی قلعی کھول دی۔ آج کی بارش نے کناٹ پلیس، آئی ٹی او، دھولا کنواں، نارائنا، پٹیل نگر، ذخیرہ انڈر پاس، آزاد مارکیٹ انڈر پاس، جواہر لال نہرو اسٹیڈیم گول چکر، بھیشم پتامہ مارگ، بارہ پُلا سیوا نگر ڈپو، کملا نگر مارکیٹ، امبیڈکر اسٹیڈیم، پرگتی میدان، جی ٹی کے بس ڈپو، ماڈل ٹاؤن اور کنگز وے کیمپ میں شدید آبی جماؤ کی صورتحال پیدا کر دی۔ اس وجہ سے گھنٹوں ٹریفک جام رہا اور بی جے پی کے ترقی یافتہ دہلی کے خواب کی حقیقت سامنے آ گئی۔

دیویندر یادو نے کہا کہ دہلی کانگریس مانسون کے آغاز سے قبل ہی ریکھا گپتا حکومت کو خبردار کر چکی تھی کہ بارش سے قبل نالیوں اور سیور کی گاد کی مکمل صفائی ہونی چاہیے اور گاد کو جلد از جلد ہٹایا جانا چاہیے، لیکن پی ڈبلیو ڈی کو بار بار وقت دینے کے باوجود وہ یہ کام مکمل کرنے میں ناکام رہا۔ آج کی بارش نے ایک بار پھر بی جے پی حکومت کے جھوٹے دعووں کو بے نقاب کیا ہے اور اس کی قیمت دہلی کے عوام کو چکانی پڑ رہی ہے۔ بارش ہوتے ہی ٹریفک جام اور آبی جماؤ کا نظارہ ہے، اس سے کوئی نجات نہیں ملتی اور عوام کی زندگی درہم برہم ہو جاتی ہے۔

دیویندر یادو کا کہنا ہے کہ ہر بارش دہلی میں تباہی کا باعث بن رہی ہے۔ بی جے پی کی دہلی حکومت کے وزراء اور خود وزیر اعلیٰ ان خامیوں کا الزام افسران پر ڈال رہے ہیں۔ لیکن حقیقت یہ ہے کہ حکومت نے زمینی سطح پر وقت پر کوئی مؤثر اقدامات نہیں کیے۔ انہوں نے کہا کہ وزیر اعلیٰ کی جانب سے دہلی حکومت کے مختلف محکموں کے سربراہان کو ہر ماہ کی 28 تاریخ تک کارروائی رپورٹ پیش کرنے کی ہدایت ایک فضول مشق محسوس ہوتی ہے۔ وزیر اعلیٰ، وزراء اور اعلیٰ افسران کی ان تمام میٹنگز کا مقصد عوامی خدمات کی بہتری اور حکومتی مشینری کی کارکردگی کو بڑھانا ہوتا ہے، لیکن ریکھا گپتا حکومت ہر شعبے میں بری طرح ناکام ہو رہی ہے۔