انکم ٹیکس ریٹرن داخل کرنے کی آخری تاریخ میں آج تک کی توسیع

محکمہ انکم ٹیکس نے انکم ٹیکس ریٹرن  داخل کرنے کی آخری تاریخ یعنی آئی ٹی آر میں مزید ایک دن کی توسیع کردی ہے۔ لہذا، آئی ٹی آر فائل کرنے کی آخری تاریخ آج یعنی  16 ستمبر 2025 ہے۔ پہلے یہ تاریخ 15 ستمبر مقرر کی گئی تھی۔ تاہم، آئی ٹی آر فائل کرنے کی ابتدائی آخری تاریخ 31 جولائی 2025 تھی، جسے پہلے ہی بڑھا دیا گیا تھا۔

محکمہ انکم ٹیکس کی جانب سے جاری پریس ریلیز میں کہا گیا  ہےکہ انکم ٹیکس ریٹرن داخل کرنے کی آخری تاریخ میں اب ایک دن کی توسیع کرکے 16 ستمبر کر دی گئی ہے۔ یہ قدم ان ٹیکس دہندگان کی سہولت کے لیے اٹھایا گیا ہے جنہیں انکم ٹیکس ای فائلنگ پورٹل پر تکنیکی مسائل کی وجہ سے ریٹرن فائل کرنے میں پریشانی کا سامنا تھا۔محکمہ انکم ٹیکس نے یہ بھی بتایا کہ ای فائلنگ پورٹل پر ضروری اپ ڈیٹس اور تبدیلیاں کرنے کے لیے 16 ستمبر کو رات 12:00 بجے سے 2:30 بجے تک دیکھ بھال کی جائے گی۔

آئی ٹی آر داخل کرنے کی تاریخ میں ایک دن کی توسیع سے ٹیکس دہندگان کو کچھ راحت ملی ہے۔ لیکن محکمہ نے ہر ایک سے اپیل کی ہے کہ وہ وقت پر اپنا انکم ٹیکس ریٹرن فائل کریں، تاکہ آخری وقت پر تکنیکی مسائل یا جرمانے سے بچا جا سکے۔

وقت پر انکم ٹیکس ریٹرن فائل کرنا ضروری ہے تاکہ اضافی جرمانے سے بچا جا سکے۔ انکم ٹیکس ایکٹ کے سیکشن 234F کے تحت، وہ ٹیکس دہندگان جن پر ٹیکس کی ذمہ داری ہے، مقررہ تاریخ کے بعد ریٹرن فائل کرنے پر جرمانہ عائد کیا جاتا ہے۔ اگر کسی ٹیکس دہندہ کی کل آمدنی 5 لاکھ روپے سے زیادہ ہے تو آئی ٹی آر دیر سے داخل کرنے پر 5000 روپے تک کا جرمانہ عائد کیا جائے گا۔ اس کے ساتھ ہی جن لوگوں کی آمدنی 5 لاکھ روپے سے کم ہے انہیں 1000 روپے جرمانہ ادا کرنا ہوگا۔