’راجیہ سبھا میں 90 منٹ تک وزیر اعظم جھوٹ کی گنگا بہاتے رہے‘، پی ایم مودی پر کانگریس کا شدید حملہ

صدر جمہوریہ کے خطاب پر چرچہ کے جواب میں وزیر اعظم نریندر مودی نے 6 فروری کو راجیہ سبھا میں طویل تقریر کی۔ انھوں نے ایوان بالا میں کئی ایسی باتیں رکھیں جس پر کانگریس نے سخت ناراضگی کا اظہار کیا ہے اور پارٹی لیڈران نے ان کی باتوں پر اپنی ناراضگی بھی ظاہر کی ہے۔ رکن پارلیمنٹ جئے رام رمیش نے تو حملہ آور رخ اختیار کرتے ہوئے پی ایم مودی پر 90 منٹ تک جھوٹ کی گنگا بہانے کا الزام عائد کر دیا۔

راجیہ سبھا میں وزیر اعظم مودی کی تقریر پر کانگریس لیڈر جے رام رمیش نے کہا کہ ’’90 منٹ کی تقریر تھی وہی ’پردھان منتری اتیہاس توڑ- مروڑ یوجنا‘ اور ’پردھان منتری کانگریس بدنام یوجنا‘۔ اس کے سوا اور کچھ تھا ہی نہیں۔ کانگریس کو نشانہ بنایا اور کانگریس کو بدنام کیا۔ تاریخ کو توڑ مروڑ کر انہوں نے پارلیمنٹ کے سامنے رکھا۔‘‘ انھوں نے مزید کہا کہ ’’ان کی تقریر ایک انتخابی تقریر کی طرح تھی۔ وہ اس طرح بولتے رہے جیسے وہ عوامی ریلیوں میں بولتے ہیں۔ وزیر اعظم نے پارلیمنٹ کی عزت و وقار کا بھی خیال نہیں رکھا۔ 90 منٹ تک وہ جھوٹ کی گنگا بہاتے رہے۔‘‘

راجیہ سبھا میں کانگریس کے ڈپٹی لیڈر پرمود تیواری نے اس حوالے سے کہا کہ ’’مایوسی اور ناامیدی سے بھری ہوئی تقریر تھی۔ لگتا ہے کہ وزیر اعظم کے پاس ملک کو دینے کے لیے کوئی پیغام بھی نہیں بچا ہے۔‘‘ انھوں نے یہاں تک کہہ دیا کہ ’’وہ (وزیر اعظم) اپنی حکومت کے کام کاج سے پوری طرح مایوس ہیں، اس لیے صرف کانگریس کو گالی دیتے رہے۔ وہ ملک کے لیے کیا کریں گے یہ نہیں بتا پائے۔‘‘

کانگریس لیڈر راجیو شکلا نے بھی پی ایم مودی کی تقریر کو ہدف تنقید بنایا ہے۔ انھوں نے الزام عائد کیا کہ وزیر اعظم کی تقریر میں کانگریس کے علاوہ کچھ نہیں تھا۔ وہ کہتے ہیں کہ ’’وہ صبح سے شام تک کانگریس کو گالیاں دیتے ہیں۔ انہوں نے اٹل بہاری واجپئی یا کسی دوسرے وزیر اعظم کے بارے میں بات نہیں کی۔ ایسا لگتا ہے کہ 2014 سے قبل کچھ تھا ہی نہیں۔‘‘

صرف کانگریس لیڈران ہی نہیں، بلکہ کچھ دیگر پارٹیوں کے لیڈران نے بھی پی ایم مودی کی تقریر کو مایوس ٹھہرایا۔ بھارتیہ کمیونسٹ پارٹی (سی پی آئی) کے رکن پارلیمنٹ سنتوش کمار نے تنقید کرتے ہوئے کہا کہ ’’خوش قسمتی سے ان کی تقریر میں صرف 3 بار نہرو کا نام لیا گیا۔ یہ ان کی تقریر کا بہترین حصہ تھا اور باقی وہی پرانی باتیں دوہرائی گئیں۔ میں وزیر اعظم سے درخواست کرنا چاہوں گا کہ وہ تھوڑا اور ہوم ورک کریں اور نئے نکات کے ساتھ سامنے آئیں۔‘‘