سری نگر میں رواں موسم سرما کی پہلی برف باری

سری نگر: محکمہ موسمیات کی پیش گوئی کے عین مطابق وادی کشمیر کے میدانی علاقوں میں ہفتے کی صبح رواں موسم سرما کی پہلی برف باری ہوئی۔ گرمائی دارلحکومت سری نگر اور دیگر ملحقہ علاقہ جات میں لوگ جب ہفتے کی صبح نیند سے جاگے تو ہر سو سفید چادر بچھ گئی تھی۔ میدانوں، پارکوں، سڑکوں اور مکانوں کے چھتوں سے لے کر درختوں، بجلی کے کھمبوں اور تاروں تک برف کی مہین چادر کا قبضہ تھا۔

بتا دیں کہ محکمہ موسمیات کے مطابق وادی کے بالائی علاقوں میں دوران شب بھاری برف باری جبکہ میدانی علاقوں میں ہلکی سے درمیانی درجے کی برف باری ہوئی ہے۔ متعلقہ محکمہ کا کہنا ہے کہ وادی کشمیر میں اب 20 دسمبر تک موسم مجموعی طور پر خشک رہنے کی توقع ہے۔ ہفتے کی علی الصبح سری نگر میں کم سے کم تین انچ برف جمع ہوئی تھی تاہم بعد ازاں موسم بہتر ہونے بلکہ آفتاب نمودار ہوتے ہی دوپہر سے قبل ہی برف کی چادر بجلی کی طرح غائب ہوگئی۔

سری نگر میں برف پگھلنے کے ساتھ ہی ہر سو سڑکوں اور گلی کوچوں میں پانی جمع ہوگیا جس سے لوگوں کے عبور و مرور میں مشکلات پیدا ہوئیں۔ لوگوں کا الزام ہے کہ سری نگر میں ہلکی برف باری کیا ہوئی کہ برقی رو غائب ہوگئی۔ ادھر وادی کشمیر میں ہفتے کے روز موسم نہ صرف دن بھر خشک رہا بلکہ آفتاب بھی نمودار ہوا، جس سے جہاں برف کی چادر بھی غائب ہوئی وہیں سردی کی شدت میں قدرے کمی بھی محسوس کی گئی۔

محکمہ موسمیات کے مطابق گرمائی دارلحکومت سری نگر میں گزشتہ شب کا کم سے کم درجہ حرارت منفی 0.6 ڈگری سینٹی گریڈ ریکارڈ ہوا ہے۔ وادی کے شہرہ آفاق سیاحتی مقام گلمرگ میں کم سے کم درجہ حرارت منفی 4.0 ڈگری سینٹی گریڈ جبکہ پہلگام میں کم سے کم درجہ حرارت منفی 0.9 ڈگری سینٹی گریڈ ریکارڈ کیا گیا۔

لداخ یونین ٹریٹری کے ضلع لیہہ میں کم سے کم درجہ حرارت منفی 6.1 ڈگری سینٹی گریڈ جبکہ ضلع کرگل میں کم سے کم درجہ حرارت منفی 3.0 ڈگری سینٹی گریڈ اور دراس میں کم سے کم درجہ حرارت منفی 6.3 ڈگری سینٹی گریڈ ریکارڈ ہوا ہے۔ قابل ذکر ہے وادی کشمیر میں سال گذشتہ ماہ نومبر کے اوائل میں ہی بھاری برف باری ہوئی تھی جس سے لوگوں کو گوناگوں مشکلات سے دوچار ہونا پڑا تھا۔