بی جے پی نے گرگٹ کو بھی ایک رَنگ سکھا دیا، جنھیں چین کو ’لال آنکھیں‘ دکھانی تھیں وہ لال قالین بچھا رہے: کانگریس

بی جے پی ہیڈکوارٹر میں بھارتیہ جنتا پارٹی اور چینی کمیونسٹ پارٹی (سی پی سی) کے رہنماؤں کے درمیان ہونے والی خفیہ میٹنگ پر کانگریس نے شدید حملہ کیا ہے۔ کانگریس نے منگل کو پریس کانفرنس کر بی جے پی-سی پی سی میٹنگ کے فوراً بعد چین کی جانب سے کشمیر کی شکسگام وادی پر دعویٰ کیے جانے کے متعلق سوال اٹھایا۔ چین معاملے پر بی جے پی کے دوہرے رویے کو بے نقاب کرتے ہوئے کانگریس نے کہا کہ ’’ملک کو یہ جاننے کا حق ہے کہ بی جے پی اور چین کی حکمراں جماعت کے درمیان بند کمروں میں ہوئی میٹنگوں میں کیا بات چیت ہوئی۔‘‘

کانگریس ہیڈکوارٹر میں پریس کانفرنس سے خطاب کرتے ہوئے میڈیا اینڈ پبلسٹی ڈپارٹمنٹ کے چیئرمین پون کھیڑا نے ویڈیو دکھاتے ہوئے طنز کسا کہ ’’بی جے پی نے گرگٹ کو بھی ایک رنگ سکھا دیا ہے، جنہیں چین کو لال آنکھیں دکھانی تھیں ان کے لیے بی جے پی نے لال قالین بچھا دی۔‘‘ انہوں نے مزید کہا کہ بی جے پی نے چین کی پارٹی سی پی سی سے میٹنگ کی ہے۔ یہ جب اقتدار میں نہیں تھے، تب بھی چین جا کر ملتے تھے، آر ایس ایس والے ٹریننگ لیتے تھے۔ ہمیں دقت نہیں ہے کہ کوئی سیاسی پارٹی کسی دیگر ملک کی سیاسی پارٹی سے ملے یا بات چیت کرے۔ لیکن ہمیں دقت ہے بی جے پی کے دوہرے رویہ سے، عیاری اور مکاری سے۔ بی جے پی سالوں تک چیختی رہی کہ کانگریس نے ’ایم او یو‘ پر دستخط کر دیا ہے اور اب یہ خود میٹنگ کر رہے ہیں۔ ساتھ ہی انہوں نے کہا کہ ہمیں دقت بی جے پی کی نیت سے ہے، کیونکہ بند دروازوں کے پیچھے ہونے والی ان میٹنگوں کے بعد ملک کو خمیازہ بھگتنا پڑتا ہے۔

پون کھیڑا نے الزام عائد کیا کہ نریندر مودی کی قیادت والی بی جے پی حکومت نے چین کے تئیں ’سرنڈر کرنے کی پالیسی‘ اپنائی ہے۔ حکومت کا دوہرا رویہ اور خاموشی نہ صرف ہندوستان کی خارجہ پالیسی کو کمزور کر رہی ہے بلکہ قومی مفادات سے بھی سنگین سمجھوتہ کر رہی ہے۔ انہوں نے حالیہ واقعہ کا ذکر کرتے ہوئے کہا کہ ’’پیر کو بی جے پی ہیڈکوارٹر میں چینی کمیونسٹ پارٹی اور بی جے پی لیڈران کی میٹنگ ہوئی تھی اور اس کے کچھ گھنٹوں بعد چین نے کشمیر کی شکسگام وادی پر اپنا دعویٰ پیش کر  دیا۔‘‘ ساتھ ہی انہوں نے کہا کہ ایک طرف مودی حکومت کے ذریعہ عوام سے چینی سامان کا بائیکاٹ کرنے کو کہا جاتا ہے، دوسری طرف چینی وفد کے لیے بی جے پی ہیڈکوارٹر میں ریڈ کارپیٹ بچھایا جاتا ہے۔ چینی کمپنیوں کو ہندوستانی میں سرمایہ کاری، زمین اور ٹھیکے دیے جا رہے ہیں۔

کانگریس لیڈر نے کہا کہ ہندوستان میں چینی سامان کا سیلاب آ گیا ہے، لیکن حکومت اسے روکنے کے لیے ٹھوس قدم نہیں اٹھا رہی ہے۔ چین نے ’ریئر ارتھ‘ (نایاب ارضی عناصر) اور فرٹیلائیزر (کھاد) پر غیر اعلانیہ پابندی عائد کر ہندوستانی کسانوں کو نقصان پہنچایا، جس پر مودی حکومت خاموشی اختیار کر رکھی ہے۔ انہوں نے یہ بھی کہا کہ جب نریندر مودی گجرات کے وزیر اعلیٰ تھے تو وہاں اسکولوں میں چینی زبان سیکھنے کی وکالت کرتے تھے۔

پون کھیڑا نے کہا کہ امریکی صدر ڈونالڈ ٹرمپ کے ہندوستان-پاکستان کے درمیان جنگ میں ثالثی کا کردار ادا کرنے جیسے دعوے اب چین بھی کر رہا ہے۔ چین پینگونگ تسو جھیل کے راستے ملٹری پل اور برہمپتر ندی کے پاس ڈیم بنا رہا ہے۔ چین نے کئی بار ڈوکلام، سلی گوڑی کوریڈور، شکسگام سے لے کر اروناچل پردیش تک ہندوستان کے ساتھ ناپاک حرکت کی۔ لیکن مودی حکومت خاموش ہے۔ ہندوستان کی سرحدوں کے پاس چین انفراسٹرکچر بنا رہا ہے اور مودی حکومت چینی مزدوروں کو ویزا دے رہے ہیں۔ ساتھ ہی انہوں نے یاد دلایا کہ گلوان میں 20 بہادر فوجیوں کی شہادت کے بعد وزیر اعظم مودی نے چین کو کلین چٹ دے کر پوری دنیا میں ہندوستان کی پوزیشن کو کمزور کر دیا تھا۔

کانگریس لیڈر نے سوال کیا کہ بی جے پی-آر ایس ایس واضح کریں کہ چینی کمیونسٹ پارٹی کے ساتھ ان کی خفیہ میٹنگ کا ایجنڈا کیا ہے؟ کیا بند دروازوں کی ان میٹنگوں میں چینی تجاوزات سے متعلق کوئی بات ہوئی؟ انہوں نے آگے سوال کیا کہ ’آپریشن سندور‘ کے دوران چین کے ذریعہ پاکستان کو دی گئی فوجی مدد پر بی جے پی نے سوال کیوں نہیں پوچھا؟ جب چین اروناچل پردیش کے شہریوں کو حراست میں لیتا ہے اور ہندوستانی گاؤں کے نام بدلتا ہے، تب وزیر اعظم خاموش کیوں رہتے ہیں؟ پی ایم کیئر فنڈ میں چین کی ان کمپنیوں سے پیسہ کیوں لیا گیا جو بلیک لسٹڈ ہیں؟ پون کھیڑا نے یہ بھی کہا کہ ملک ایک جھکا ہوا وزیر اعظم کبھی قبول نہیں کرے گا، جو دشمن کے سامنے سر بسجود ہو جائے۔ ساتھ ہی انہوں نے شفافیت کا مطالبہ کرتے ہوئے کہا کہ بی جے پی بتائے کہ ان بند کمروں کی میٹنگوں میں ہندوستان کے کتنے مفادات کا سمجھوتہ کیا گیا۔