بہار ادھیکار یاترا: ’این ڈی اے حکومت سے عوام نالاں، گھروں میں خوف اور تھانوں پر بدعنوانی کا سایہ‘

پٹنہ: بہار اسمبلی میں قائد حزب اختلاف اور راشٹریہ جنتا دل (آر جے ڈی) کے لیڈر تیجسوی یادو اپنی ’بہار ادھیکار یاترا‘ پر نکلے ہیں۔ یاترا کے دوسرے دن انہوں نے ریاست کی این ڈی اے حکومت کو سخت تنقید کا نشانہ بنایا اور کہا کہ موجودہ حکومت عوام کو نہ صرف مایوس کر رہی ہے بلکہ لوگوں کی جان و مال کی سلامتی بھی خطرے میں ہے۔ ان کے مطابق جرائم کی وارداتوں میں اس قدر اضافہ ہو گیا ہے کہ لوگ اپنے گھروں میں بھی محفوظ محسوس نہیں کر رہے ہیں۔

تیجسوی یادو نے میڈیا سے گفتگو کرتے ہوئے کہا کہ ’’این ڈی اے حکومت سے عوام نالاں ہیں۔ بدعنوانی اپنی انتہا پر ہے، پولیس تھانوں میں رنگداری بڑھ گئی ہے، عام آدمی کی کوئی شنوائی نہیں ہو رہی۔‘‘ انہوں نے مزید کہا کہ یہ حکومت صرف ان عناصر کو تحفظ دے رہی ہے جو بدعنوانی اور جرم سے جڑے ہوئے ہیں۔ یہی وجہ ہے کہ عوام تبدیلی کے موڈ میں ہیں اور آئندہ انتخابات میں اس حکومت کو اقتدار سے بے دخل کرنے کے لیے پرعزم ہیں۔

اپنی یاترا کے مقاصد پر روشنی ڈالتے ہوئے تیجسوی یادو نے کہا کہ یہ یاترا عوام کے مسائل کو سمجھنے اور براہ راست ان کے درمیان جانے کا ذریعہ ہے۔ انہوں نے دعویٰ کیا کہ مختلف اضلاع میں انہیں زبردست عوامی حمایت مل رہی ہے۔ ان کے مطابق جس علاقے میں بھی وہ پہنچ رہے ہیں، لوگ بڑی تعداد میں سڑکوں پر آ کر یاترا کا خیرمقدم کر رہے ہیں۔ یاترا کے دوسرے دن ان کا قافلہ بختیارپور، باڑھ، مکامہ، تیگھاڑا اور بیگوسرائے سے گزرا۔

این ڈی اے حکومت پر بصیرت کے فقدان کا الزام عائد کرتے ہوئے تیجسوی نے کہا کہ ’’حکومت نقل تو کر سکتی ہے لیکن مستقبل کے لیے کوئی واضح نظریہ نہیں دے سکتی۔‘‘ انہوں نے وعدہ کیا کہ اگر مہاگٹھ بندھن کی حکومت بنی تو ریاست میں ہر تعلیم یافتہ نوجوان کو روزگار فراہم کرنے کی کوشش ہوگی۔ ساتھ ہی ریاست میں صنعت لگانے، تعلیم اور صحت کے نظام کو بہتر بنانے کی سمت میں اقدامات کیے جائیں گے۔

انہوں نے کہا کہ بہار میں نوجوان بڑی تعداد میں تعلیم حاصل کر رہے ہیں، مگر موجودہ حکومت کی ناکامی کی وجہ سے انہیں نوکریاں نہیں ملتیں۔ اس صورتحال میں بے روزگاری بڑھ رہی ہے اور ریاستی ترقی متاثر ہو رہی ہے۔

یاد رہے کہ اس دوران تیجسوی یادو نے وزیراعظم نریندر مودی کے یومِ پیدائش پر انہیں نیک خواہشات بھی پیش کیں لیکن ساتھ ہی مرکزی وزیر داخلہ امت شاہ پر طنز کستے ہوئے کہا کہ ’’وہ بہار آ رہے ہیں، مگر پہلے یہ بتائیں کہ اب تک وہ بی جے پی کا قومی صدر کیوں مقرر نہیں کر پائے؟‘‘

ماہرین کے مطابق تیجسوی یادو کی یہ یاترا آئندہ انتخابات کے پیش نظر سیاسی ماحول کو گرما رہی ہے۔ آر جے ڈی کی حکمت عملی ہے کہ بدعنوانی اور جرائم جیسے ایشوز کو لے کر عوامی جذبات کو اپنے حق میں استعمال کیا جائے اور این ڈی اے کو کٹہرے میں کھڑا کیا جائے۔