سشما سوراج کے شوہر سوراج کوشل کا 73 سال کی عمر میں انتقال، طویل مدت سے تھے علیل

مشہور و معروف لیڈر آنجہانی سشما سوراج کے شوہر سوراج کوشل کا آج 73 سال کی عمر میں انتقال ہو گیا۔ وہ نئی دہلی سے بی جے پی رکن پارلیمنٹ بانسری سوراج کے والد اور معزز وکیل تھے۔ طویل مدت سے وہ بیمار چل رہے تھے اور آج وہ اس دارِ فانی سے کوچ کر گئے۔ دہلی بی جے پی نے سوشل میڈیا پوسٹ کے ذریعہ ان کے انتقال کی خبر دی۔ اس خبر نے سیاسی و سماجی حلقوں میں غم کی لہر دوڑا دی ہے۔

بنیادی طور پر ہماچل پردیش سے تعلق رکھنے والے سوراج کوشل کی پیدائش سولن میں 12 جولائی 1952 کو ہوئی تھی۔ وہ ملک کے مشہور و معروف وکیل رہے اور میزورم کے گورنر کی ذمہ داری بھی انھوں نے سنبھالی۔ دہلی بی جے پی نے اپنے ’ایکس‘ ہینڈل پر جاری پوسٹ میں بتایا کہ ان کی آخری رسومات 4 دسمبر کی شام 4.30 بجے لودی روڈ شمشان گھاٹ میں ادا کی جائے گی۔ آخری رسومات کی سبھی تیاریاں مکمل ہو چکی ہیں اور تازہ ترین خبروں میں بتایا جا رہا ہے کہ سوراج کوشل کا آخری دیدار کرنے بڑی تعداد میں لوگ پہنچے ہیں۔

اپنے والد کے انتقال پر بانسری سوراج نے شدید رنج و غم کا اظہار کیا ہے۔ انھوں نے ’ایکس‘ ہینڈل پر ایک پوسٹ بھی ڈالی ہے، جس میں لکھا ہے کہ ’’پاپا سوراج کوشل جی، آپ کی اپنائیت، آپ کی سادگی، آپ کی حب الوطنی اور آپ میں موجود بے پناہ صبر میری زندگی کی وہ روشنی ہے جو کبھی مدھم نہیں ہوگی۔‘‘ وہ مزید لکھتی ہیں کہ ’’آپ کا جانا دل کی سب سے گہری تکلیف بن کر اتری ہے، لیکن من یہی بھروسہ کیے ہوئے ہے کہ آپ اب ماں کے ساتھ پھر سے مل چکے ہیں، ایشور کی موجودگی میں، ہمیشہ کے سکون میں۔‘‘ انھوں نے آخر میں یہ بھی لکھا ہے کہ ’’آپ کی بیٹی ہونا میری زندگی کا سب سے بڑا فخر ہے، اور آپ کی وراثت، آپ کے اقدار و آپ کی دعائیں ہی میرے آگے کے ہر سفر کی بنیاد رہیں گی۔‘‘