جیل میں بند سونم وانگچک کی صحت پر تشویش، سپریم کورٹ کا ماہر ڈاکٹر سے فوری طبی جانچ کا حکم

نئی دہلی: سپریم کورٹ نے جیل میں بند ماحولیاتی کارکن سونم وانگچک کی صحت سے متعلق شکایت کا نوٹس لیتے ہوئے جمعرات کو ایک ماہر ڈاکٹر کے ذریعے ان کی طبی جانچ کرانے کا حکم دیا ہے۔ عدالت نے یہ ہدایت اس شکایت کے بعد دی کہ جیل میں فراہم کیے جانے والے آلودہ پینے کے پانی کے سبب سونم وانگچک کو پیٹ سے متعلق مسائل کا سامنا ہے۔ اس وقت وہ جودھپور کی مرکزی جیل میں قومی سلامتی قانون کے تحت حراست میں ہیں۔

جسٹس اروِند کمار اور جسٹس پی بی ورالے پر مشتمل بنچ نے جیل حکام کو یہ بھی ہدایت دی کہ سونم وانگچک کی طبی جانچ کی رپورٹ پیر تک مہر بند لفافے میں عدالت کے سامنے پیش کی جائے۔ عدالت کے سامنے سونم وانگچک کی اہلیہ گیتانجلی آنگمو کی جانب سے سینئر وکیل کپل سبل نے عرضی پیش کرتے ہوئے کہا کہ فوری طبی جانچ نہ ہونے کی وجہ سے ان کی حالت مزید خراب ہونے کا اندیشہ ہے۔

کپل سبل نے عدالت کو بتایا کہ آلودہ پینے کے پانی کے باعث سونم وانگچک کے معدے میں مسلسل تکلیف ہے، مگر جیل میں مناسب ڈاکٹر معائنہ کے لیے نہیں آ رہا۔ انہوں نے مطالبہ کیا کہ سونم وانگچک کی باقاعدہ ہفتہ وار جانچ کی اجازت دی جائے اور انہیں وہ پانی پینے دیا جائے جو اہل خانہ کی جانب سے فراہم کیا جاتا ہے۔

اس کے جواب میں راجستھان حکومت کی طرف سے پیش ہونے والے وکیل نے موقف اختیار کیا کہ گزشتہ چار مہینوں کے دوران جیل کے ڈاکٹر نے سونم وانگچک کا اکیس مرتبہ معائنہ کیا ہے اور ان کی صحت پر مسلسل نظر رکھی جا رہی ہے۔ عدالت کو یہ بھی بتایا گیا کہ انہیں وٹامن بی بارہ لینے کا مشورہ دیا گیا ہے اور تازہ ترین رپورٹ میں کوئی سنگین مسئلہ سامنے نہیں آیا۔

اضافی سالیسیٹر جنرل کے ایم نٹراج نے عدالت میں طبی رپورٹس پیش کیں، جن کے مطابق 26 ستمبر سے 26 جنوری کے درمیان وانگچک کا اکیس بار طبی معائنہ کیا گیا۔ رپورٹ میں بتایا گیا کہ ان کا بلڈ پریشر معمول کے مطابق ہے اور سینہ و پیٹ کا کلینیکل معائنہ بھی نارمل پایا گیا ہے۔

تاہم سپریم کورٹ نے واضح کیا کہ سونم وانگچک کو عام طبی جانچ کے بجائے معدے کے امراض کے ماہر ڈاکٹر کی ضرورت ہے، تاکہ ان کی شکایت کا تفصیلی اور غیر جانبدارانہ جائزہ لیا جا سکے۔ عدالت نے ریاستی حکومت کے اس بیان کو بھی ریکارڈ پر لیا کہ ایک سرکاری اسپتال کے ماہر ڈاکٹر کے ذریعے جانچ کرائی جائے گی اور اس کی رپورٹ پیر تک پیش کی جائے گی۔

واضح رہے کہ گزشتہ سال لداخ کو ریاست کا درجہ دینے اور چھٹی آئینی فہرست میں شامل کرنے کے مطالبے پر ہوئے احتجاج کے بعد، 26 ستمبر کو سونم وانگچک کو قومی سلامتی قانون کے تحت حراست میں لیا گیا تھا۔ حکومت کا الزام ہے کہ ان مظاہروں کے دوران تشدد بھڑکانے میں ان کا کردار تھا، جن میں چار افراد ہلاک اور متعدد زخمی ہوئے تھے۔