سپریم کورٹ میں سماعت تک شیو سینا کے باغیوں پر اسپیکر کوئی فیصلہ نہ لیں،چیف جسٹس کی ہدایت

سپریم کورٹ نے مہاراشٹر میں شیو سینا کے ارکان اسمبلی کی نااہلی کی سماعت شروع کی ۔ اس دوران وکیل کپل سبل نے عدالت میں کہا کہ کل نااہلی کیس کی اسمبلی میں سماعت ہوگی، اگر عدالت آج نہیں سنتی ہے تو کل اسپیکر اسے خارج کردیں گے۔ انہوں نے کہا کہ عدالت کے اس معاملہ کو سننے تک انہیں فیصلہ لینے سے روکا جائے۔ اس پر چیف جسٹس آف انڈیا این وی رمنا نے کہا کہ اسپیکر کو بتایا جائے کہ وہ ابھی کوئی فیصلہ نہ لیں۔ تاہم انہوں نے کہا کہ یہ وقت طلب معاملہ ہےاور فوری بنچ تشکیل نہیں دی جا سکتی ۔

واضح رہے اس معاملہ کا اثر مہاراشٹر کی سیاست اور حکومت کے مستقبل پر پڑےگا۔ مہاراشٹر کے سابق وزیر اعلی اور شیو سینا کے سربراہ ادھو ٹھاکرے نے یہ عرضی داخل کی ہے ۔

مہاراشٹر میں شیوسینا کے 16 ایم ایل ایز کی نااہلی کے معاملے پر آج سپریم کورٹ میں سماعت ہوئی۔ ادھو ٹھاکرے گروپکے سنیل پربھو سپریم کورٹ پہنچے اور نااہلی کیس کی سماعت کا مطالبہ کیا۔ اسی وقت اسمبلی سکریٹریٹ کے پرنسپل سکریٹری نے سپریم کورٹ میں جواب دیتے ہوئے کہا تھا کہ راہل نارویکر اسپیکر بن گئے ہیں اور انہیں نااہلی کیس کی سماعت کی اجازت ہوگی۔