ضمانت کے مقدمات میں تاخیر پر سپریم کورٹ سخت، تمام ہائی کورٹس کو فوری سماعت کے نئے احکامات جاری

نئی دہلی: سپریم کورٹ نے ملک بھر کے ہائی کورٹوں میں زیر التوا ضمانت کے مقدمات کی سماعت میں ہونے والی تاخیر پر سخت رخ اختیار کرتے ہوئے تمام ہائی کورٹس کو نئے رہنما اصول جاری کیے ہیں۔ عدالت عظمیٰ نے واضح کہا کہ ضمانت سے متعلق معاملات میں غیر ضروری تاخیر انصاف کے اصولوں کے خلاف ہے، اس لیے مقدمات کی جلد اور باقاعدہ سماعت یقینی بنانے کے لیے مؤثر نظام تیار کیا جانا چاہیے۔

چیف جسٹس سوریہ کانت کی بنچ نے پیر کو اپنے احکامات میں کہا کہ ضمانت کے مقدمات کو ہر ہفتے یا کم از کم دو ہفتے میں ایک بار ضرور سماعت کے لیے فہرست میں شامل کیا جائے۔ عدالت نے ہدایت دی کہ تمام ہائی کورٹ خودکار لسٹنگ سسٹم تیار کریں تاکہ کسی بھی مقدمے کی سماعت صرف تاریخ پر تاریخ تک محدود نہ رہ جائے۔

سپریم کورٹ نے کہا کہ ضمانت عرضی کی پہلی سماعت سے پہلے ہی ریاستی حکومت یا جانچ ایجنسی کو اپنی اسٹیٹس رپورٹ داخل کرنی ہوگی۔ عدالت کے مطابق اس سے مقدمے کی موجودہ صورت حال سمجھنے میں آسانی ہوگی اور سماعت میں غیر ضروری تاخیر سے بچا جا سکے گا۔ ساتھ ہی عرضی گزار کے وکیل کو بھی ہدایت دی گئی ہے کہ وہ ضمانت عرضی کی نقل پہلے ہی ایڈوکیٹ جنرل یا متعلقہ جانچ ایجنسی کو فراہم کرے۔

عدالت عظمیٰ نے مزید کہا کہ نئی ضمانت عرضیوں کو ہر دوسرے دن یا زیادہ سے زیادہ ایک ہفتے کے اندر سماعت کے لیے فہرست میں شامل کیا جانا چاہیے۔ سپریم کورٹ نے ایڈمیشن مرحلے پر نوٹس جاری کرنے کے پرانے طریقۂ کار پر بھی سوال اٹھاتے ہوئے کہا کہ اس کی وجہ سے مقدمات کے نپٹارے میں غیر ضروری تاخیر ہوتی ہے، اس لیے اس عمل کو ختم کیا جانا چاہیے۔

سپریم کورٹ نے یہ بھی ہدایت دی کہ جن ضمانت کے مقدمات کی سماعت کسی وجہ سے نہیں ہو پاتی، انہیں خودکار طریقے سے دوبارہ لسٹ کیا جائے۔ عدالت نے کہا کہ کسی بھی ضمانت عرضی کو طویل عرصے تک بغیر سماعت کے زیر التوا نہیں رکھا جانا چاہیے۔ اس کے علاوہ تمام ہائی کورٹوں کو ضمانت کے مقدمات کو نمٹانے کے لیے ایک واضح ٹائم لائن مقرر کرنے کی ہدایت دی گئی ہے۔

عدالت نے فارنسک سائنس لیب کی رپورٹ میں ہونے والی تاخیر پر بھی تشویش ظاہر کی۔ سپریم کورٹ نے کہا کہ متاثرین سے جڑے مقدمات میں جانچ افسران کو زیادہ ذمہ داری کے ساتھ کام کرنا ہوگا، کیونکہ جانچ میں سستی یا لاپروائی کا فائدہ ملزم کو ضمانت کی صورت میں مل سکتا ہے۔

سپریم کورٹ نے زور دے کر کہا کہ ہائی کورٹس، جانچ ایجنسیاں اور حکومتیں مل کر ایسا مؤثر نظام تیار کریں جس سے ایک طرف متاثرین کے حقوق محفوظ رہیں اور دوسری جانب ضمانت مقدمات کا بروقت نپٹارا بھی ممکن ہو سکے۔