کیجریوال کی اہلیہ کا جذباتی پیغام ،’کیا یہ لوگ  انہیں ختم کرنا چاہتے ہیں ؟‘

دہلی کے وزیر اعلی اروند کیجریوال کے جیل جانے کے بعد اب ان کی اہلیہ سنیتا کیجریوال نے عام آدمی پارٹی کی انتخابی مہم کی ذمہ داری سنبھال لی ہے۔ لوک سبھا انتخابات کی مہم شروع کرنے کے ساتھ ساتھ وہ عوام کے درمیان وزیر اعلیٰ کیجریوال کا پیغام لے کر جا رہی ہیں۔ دہلی کے وزیر اعلیٰ کی اہلیہ سنیتا کیجریوال نے ہفتہ  یعنی 27 اپریل کو جذباتی پیغام کے ساتھ دہلی کی سڑکوں پر نکل آئیں۔ انہوں نے کہا کہ دہلی کے وزیر اعلی اروند کیجریوال کے ساتھ ناانصافی ہو رہی ہے۔

مشرقی دہلی لوک سبھا حلقہ میں عام آدمی پارٹی کے دلت امیدوار کلدیپ کمار کے روڈ شو کے دوران، وہ اپنے شوہر کے لیے ہمدردی حاصل کرنے کی پوری کوشش کرتی نظر آئیں۔ اس دوران انہوں نے یہ بھی بتایا کہ ان کے شوہر اروند کیجریوال کو جیل میں انسولین نہیں دی گئی۔

مشرقی دہلی میں روڈ شو کے دوران کار میں کلدیپ کمار کے پاس کھڑی سنیتا کیجریوال نے راستے میں جمع لوگوں کا خیرمقدم قبول کرتے ہوئے جذباتی لہجے میں صرف ایک سوال اٹھایا، ’’اروند جی کا کیا قصور تھا کہ وہ جیل میں بند ہیں، کیا یہ لوگ انہیں ختم کرنا چاہتے ہیں؟" ان کے ساتھ موجود کچھ کارکنان کیجریوال کے پوسٹر کو پکڑے ہوئے نظر آئے، جس پر "ووٹ کے ذریعے جیل کا جواب" لکھا ہوا تھا۔

سنیتا کیجریوال نے اپنے شوہر اور وزیر اعلی اروند کیجریوال کی ہائی شوگر اور کئی دنوں سے انسولین نہ ملنے کا مسئلہ اٹھا کر معاملے کی سنگینی کو اجاگر کرنے کی کوشش کی۔ عوام سے خطاب کرتے ہوئے سنیتا کیجریوال نے وہی تمام باتیں دہرائیں جو انہوں نے پہلے اروند کیجریوال کے خط اور ویڈیو کے ذریعے عوام کے سامنے رکھی تھیں۔

انہوں نے کہا، "دہلی کے وزیراعلیٰ پچھلے 12 سالوں سے ذیابیطس کے مرض میں مبتلا ہیں۔ وہ روزانہ انسولین لیتے ہیں۔ جیل جانے کے بعد انہیں انجکشن لگانے کی اجازت نہیں دی جا رہی تھی۔ کیا یہ لوگ انہیں ختم کرنا چاہتے ہیں؟ ان کے ساتھ ناانصافی ہو رہی ہے۔ ان کا قصور کیا ہے؟ آپ سب کو دیکھ کر بہت اطمینان ہوتا ہے۔ دہلی کے لوگ اروند کیجریوال سے اتنا پیار کرتے ہیں، یہ ان لوگوں سے  برداشت  نہیں ہوتا۔

معلومات کے مطابق، دہلی کے وزیر اعلی کی اہلیہ سنیتا کیجریوال اتواریعنی آج  28 اپریل کو مغربی دہلی میں عوام سے اروند کیجریوال کے لیے حمایت حاصل کریں گی۔ دہلی کے علاوہ وہ پنجاب، گجرات اور ہریانہ میں بھی عام آدمی پارٹی کے امیدواروں کے لیے مہم چلائیں گی۔ سنیتا کے ساتھ مقامی ایم ایل اے بھی تمام روڈ شو کے دوران مہم میں شامل رہیں گے۔