اجیت پوار طیارہ حادثہ معاملے میں پونے پولیس کی طرف سے حادثاتی موت کی رپورٹ درج

پونے (دیہات) پولیس نے بارامتی تعلقہ پولیس اسٹیشن میں اس طیارہ حادثے کے سلسلے میں حادثاتی موت’ ایکسیڈینٹل ڈیتھ رپورٹ‘ (اے ڈی آر) درج کی ہے جس میں مہاراشٹر کے نائب وزیراعلیٰ اجیت پوار کی موت ہوگئی تھی۔ پولیس افسران نے بتایا کہ حادثے کی وجوہات جاننے کے لیے تحقیقات ابھی جاری ہیں۔

ڈائریکٹوریٹ جنرل آف سول ایوی ایشن (ڈی جی سی اے) اورایئرکرافٹ ایکسیڈنٹ انویسٹی گیشن بیورو (اے اے آئی بی) کی ٹیمیں حادثے کی جانچ کرنے اور اس افسوسناک واقعہ کی وجوہات کا پتہ لگانے کے لیے جائے حادثہ پر موجود ہیں۔ پولیس کے مطابق حادثے سے متعلق تمام پہلوؤں کی تفتیش کی جا رہی ہے۔ اے ڈی آر کو مہاراشٹر کے کریمنل انویسٹی گیشن ڈپارٹمنٹ (سی آئی ڈی) کے حوالے کیا جائے گا، جو اے اے آئی بی ٹیم کے نتائج کی بنیاد پر تحقیقات کرے گا۔

دریں اثنا نائب وزیراعلیٰ پوار کا آخری سفر آج صبح بارامتی میں ان کے آبائی گاؤں کاتھیواڑی میں شروع اورصبح 11 بجے بارامتی کے ودیا پرتشتھان گراؤنڈ میں ان کی آخری رسومات ادا کی گئیں۔ آخری رسومات سے قبل ان کی تعزیت کے لیے خاندان کے افراد، رشتہ داروں اور حامیوں کی بڑی تعداد کاتھیواڑی میں واقع پوار خاندان کے فارم پر پہنچی جس میں کئی اہم سیاسی رہنماشامل تھے۔ مہاراشٹرکے وزیراعلیٰ دیویندر فڈنویس، نائب وزیراعلیٰ ایکناتھ شندے اور کئی دیگر سینئر سیاسی رہنما آنجہانی رہنما کو خراج عقیدت پیش کرنے کے لیے آخری رسومات میں شریک ہوئے۔

 اس افسوسناک واقعے کے پیش نظرمہاراشٹرحکومت نے 3 روزہ سرکاری سوگ کا اعلان کیا ہوا ہے۔ اس مدت کے دوران تعظیم کے طور پرپوری ریاست کی تمام سرکاری عمارتوں پر قومی پرچم نصف سرنگوں رہے گا۔ غورطلب ہے کہ وی ایس آرکے ذریعہ چلائے جارہے لیرجیٹ 45 طیارہ (رجسٹریشن وی ٹی۔ایس ایس کے) میں حادثے کے وقت نائب وزیراعلیٰ پوار کے علاوہ ایک پرسنل سیکورٹی آفیسر(پی ایس او)، ایک فلائٹ اٹینڈنٹ اور عملے کے دو ارکان، ایک پائلٹ ان کمانڈ(پی آئی سی) اور ایک سیکنڈ ان کمانڈ (ایس آئی سی) بھی سوار تھے۔

مرنے والوں کی شناخت ودیت جادھو (مرد) اور پنکی مالی (خاتون) کے طور پر ہوئی ہے۔ مسافروں کی فہرست کے مطابق عملے کے ارکان پی آئی سی سمیت کپور اور ایس آئی سی شامبھوی پاٹھک تھے۔ نیوز ایجنسی آئی اے این ایس کی رپورٹ میں کہا گیا ہے کہ وزارت شہری ہوا بازی کی طرف سے فراہم کردہ مکمل تفصیلات کے مطابق حادشے کا شکار ہونے والا طیارہ لیرجیٹ 45 تھا جس کا رجسٹریشن وی ٹی۔ایس ایس کے تھا اور اس کی دیکھ بھال آپریٹر وی ایس آر وینچرس کررہا تھا۔