زوبین گرگ کی موت کے معاملے میں موسیقار شیکھر جیوتی گوسوامی گرفتار

مشہور آسامی گلوکار زوبین گرگ کی بے وقت موت کی تحقیقات کر رہی خصوصی تفتیشی ٹیم (ایس آئی ٹی) نے موسیقار شیکھر جیوتی گوسوامی کو گرفتار کر لیا ہے۔ گوسوامی اس کیس سے جڑے متنازعہ یاٹ ٹرپ پر موجود تھے۔ اسے پوچھ گچھ کے لیے حراست میں لے لیا گیا ہے تاہم ابھی تک اس کے خلاف الزامات کا انکشاف نہیں کیا گیا ہے اور نہ ہی یہ واضح ہے کہ ان کے خلاف کیا الزامات عائد کیے گئے ہیں۔

ذرائع کے مطابق کئی محاذوں پر تحقیقات جاری ہے جس میں گرگ کی ناگہانی موت سے متعلق حالات کی مکمل جانچ بھی شامل ہے۔ کاروباری اور ثقافتی کارکن شیام کانو مہانتا بھی ایس آئی ٹی کے زیر تفتیش ہیں۔سنگاپور آسام ایسوسی ایشن کے کئی ارکان کو بھی اس کیس سے متعلق مبینہ بے ضابطگیوں کے الزام میں حراست میں لیا جا سکتا ہے۔ حکام نے عندیہ دیا ہے کہ تحقیقات آگے بڑھنے کے ساتھ مزید لوگوں کو حراست میں لیا جا سکتا ہے۔ اس سے پہلے ایس آئی ٹی کے اہلکاروں نے مہانتا کی رہائش گاہ پر چھاپہ مارا تھا، لیکن چھاپے کے نتائج کی کوئی تفصیلات جاری نہیں کی گئی ہیں۔

اس دوران ایس آئی ٹی کی ٹیم نے زوبین گرگ کے منیجر سدھارتھ شرما کے گھر پر بھی چھاپہ مارا۔ اس دوران سی آئی ڈی کی ایک ٹیم ان کے گھر کے باہر گھنٹوں کھڑی رہی۔ سدھارتھ کا خاندان 2019 سے اس مقام پر رہ رہا ہے۔ ایس آئی ٹی نے اس بات کا انکشاف نہیں کیا ہے کہ منیجر کے گھر سے کیا برآمد ہوا ہے یا گلوکار کی موت میں اس نے کیا کردار ادا کیا ہے۔ (بشکریہ نیوز پورٹل ’آج تک‘)