یوپی میں ٹھٹھرتی سردی، دہلی میں پارہ 6 ڈگری تک گرنے کا امکان، بہار سمیت شمالی ہندوستان میں سخت انتباہ

نئی دہلی: شمالی ہندوستان کے بڑے حصے اس وقت شدید سردی، سرد لہر اور گھنے کہرے کی لپیٹ میں ہیں۔ اتر پردیش اور بہار میں کڑاکے کی سردی نے معمولاتِ زندگی متاثر کر دیے ہیں، جبکہ دہلی این سی آر میں گزشتہ چند دنوں سے کہرے اور سرد ہواؤں کا تسلسل برقرار ہے۔ محکمہ موسمیات ہند کے مطابق 23 دسمبر سے موسم کے مزاج میں جزوی تبدیلی متوقع ہے، تاہم مہینے کے اختتامی دنوں میں سردی کی شدت بڑھ سکتی ہے۔

دہلی این سی آر میں منگل سے آسمان صاف رہنے اور ہلکی دھوپ نکلنے کے آثار ہیں۔ اس دوران 10 سے 25 کلومیٹر فی گھنٹہ کی رفتار سے ہوائیں چل سکتی ہیں۔ محکمۂ موسمیات کا کہنا ہے کہ 23 سے 26 دسمبر کے درمیان زیادہ سے زیادہ اور کم سے کم درجۂ حرارت میں بڑی گراوٹ کا امکان نہیں لیکن 27 اور 28 دسمبر کو زیادہ سے زیادہ درجۂ حرارت 19 ڈگری سیلسیس جبکہ کم سے کم 6 ڈگری سیلسیس تک گر سکتا ہے، جس سے سردی مزید تیز محسوس ہوگی۔

اتر پردیش کے کئی اضلاع میں گھنے کہرے اور ایکسٹریم کولڈ ڈے کا الرٹ جاری کیا گیا ہے۔ ان علاقوں میں حدِ نگاہ 50 میٹر تک محدود رہنے کا خدشہ ہے۔ پریاگ راج، کانپور، لکھنؤ، وارانسی، سون بھدر، مرزا پور، چندولی، سنت روی داس نگر، جونپور، غازی پور، اعظم گڑھ، سلطان پور اور امبیڈکر نگر میں شدید سردی کے ساتھ کہرے کی صورتحال بن سکتی ہے۔ موسم کے ماہرین نے شہریوں اور مسافروں کو غیر ضروری سفر سے گریز اور احتیاطی تدابیر اختیار کرنے کی ہدایت دی ہے۔

محکمۂ موسمیات کے مطابق ایودھیا، پریاگ راج، فتح گڑھ، لکھنؤ، فُرصت گنج، باندا، کشی نگر، اعظم گڑھ، چُرک، وارانسی، کانپور، کنوج اور بہرائچ میں منگل کے روز گھنے کہرے کے باعث حدِ نگاہ 50 میٹر تک رہ سکتی ہے۔ ایسے میں سڑکوں پر گاڑیاں آہستہ چلانے اور فوگ لائٹس کے استعمال پر زور دیا گیا ہے۔ لکھنؤ میں دن کا درجۂ حرارت 23 اور رات کا 12 ڈگری سیلسیس کے آس پاس رہنے کا امکان ہے۔

بہار میں پٹنہ سمیت بیشتر اضلاع میں تیز پچھوا ہواؤں کے باعث شیت لہر کا اثر نمایاں رہے گا۔ گیا، ارول، نالندہ اور جہان آباد کے بعض مقامات پر خطرناک شیت لہر چلنے کا امکان ظاہر کیا گیا ہے، جبکہ سیتامڑھی اور شیوہر میں گھنا کہرا چھانے کی پیش گوئی ہے۔ حکام نے عوام سے اپیل کی ہے کہ سردی سے بچاؤ کے اقدامات اپنائیں اور موسمی انتباہات پر نظر رکھیں۔