تمل ناڈو اسٹیٹ اردو اکادمی کی تشکیل نو، ڈاکٹر نعیم الرحمن نئے وائس چیئرمین مقرر

حیدرآباد: حکومت تمل ناڈو نے ریاستی اردو اکادمی کی تشکیل نو کا اعلامیہ جاری کیا ہے۔ اکادمی کے نئے ارکان اس طرح ہوں گے۔ کے پی انبژگن ریاستی وزیر برائے اعلی تعلیم چیر مین اورڈاکٹر محمد نعیم الرحمن ڈائریکٹر ڈاکٹر ایم جی آر یونیورسٹی اس اکادمی کے وائس چیرمین ہوں گے۔

وزارتِ مالیات، وزارتِ اعلی تعلیم، وزاراتِ اقلیتی بہبود کے سیکریٹریز بھی اس کے ارکان ہوں گے۔ ان کے علاوہ پروفیسر قاضی حبیب احمد صدر شعبہ اردو، مدراس یونیورسٹی، ڈاکٹر طیب خرادی صدر شعبہ اردو نیو کالج، مدراس، اے محمد اشرف سابق سکریٹری میاسی، نیو کالج، ڈاکٹر کلیم اللہ پرنسپل مظہر العلوم کالج، آمبور، ڈاکٹر جے اکبر خان، ڈاکٹر نکہت سلطانہ، مفتی زبیر صاحب، ڈاکٹر نگار اختر، پروین پاپا، نذیر احمد، اکمل باشاہ، حافظ محمد اقبال، محمد عبد الغنی، سید کبیر احمد عمری، محمد آصف تمل اسٹیٹ اردو اکادمی کے نئے ارکان منتخب ہوئے۔

اعلامیہ کے مطابق تمل اسٹیٹ اردو اکادمی کا قیام تین سالوں کے لیے عمل میں آیا ہے۔ اس اعلان سے ریاست تمل ناڈو میں اردو بولنے والے تمام طبقوں میں مسرت کی لہر دوڑ گئی ہے۔ سابقہ حکومتوں کی سرد مہری اور لسانی اقلیتوں سے تعصب کے رویہ سے گزشتہ 12 سالوں سے اردو اکادمی کی تشکیل نو نہیں ہو پائی تھی اب اس اعلان سے ایک نئی امید اردو والوں میں پیدا ہو گئی ہے کہ ریاست میں اردو زبان کا نشاۃ ثانیہ ہوگا۔ انہوں نے اس یقین کا اظہار کیا کہ ملک کی دیگر ریاستوں کی اردو اکادمیوں کی طرح ریاست تمل ناڈو اردو اکادمی بھی اردو زبان و ادب کی ترقی و نشر و اشاعت میں اپنا بھرپور کردار ادا کرے گی۔