آر بی آئی جلد جاری کرے گا 20 روپے کا نیا نوٹ، نئے گورنر کا ہوگا دستخط، جانیئے اب پرانے نوٹ کا ہوگا کیا؟

ریزرو بینک آف انڈیا (آر بی آئی) کی طرف سے جلد ہی مہاتما گاندھی سیریز (نئی) کے تحت 20 روپے کے نئے نوٹ جاری کیے جائیں گے۔ اس پر آر بی آئی کے نئے گورنر سنجے ملہوترہ کے دستخط ہوں گے۔ ان نئے نوٹوں کے ڈیزائن اور فیچر پہلے سے چل رہے 20 روپے کے نوٹ جیسے ہی رہیں گے، صرف دستخط کو اَپڈیٹ کیا جائے گا یعنی کہ رنگ، سائز، سیکوریٹی فیچرس سبھی پہلے جیسے ہی رہیں گے۔ یہ تبدیلی آر بی آئی کے گورنر کے بدلے جانے کے بعد ہونے والا ایک عام عمل ہے۔ واضح رہے کہ سنجے ملہوترہ نے 11 دسمبر 2024 کو تین سال کی مدت کے لیے آر بی آئی کے 26ویں گورنر کے طور پر عہدہ سنبھالا ہے۔

اب سوال یہ اٹھتا ہے کہ پرانے 20 روپے کے نوٹوں کا کیا ہوگا؟ نیوز ایجنسی اے این آئی کی رپورٹ کے مطابق ریزرو بینک نے یہ واضح کر دیا ہے کہ پچھلے گورنروں کی مدت کار میں جاری کیے گئے سبھی موجودہ 20 روپے کے بینک نوٹ پہلے کی طرح چلتے رہیں گے۔

نئے 20 روپے کی نوٹ کی بات کریں تو اس میں اب مہاتما گاندھی کی تصویر اور واضح نظر آئے گی۔ اس کے علاوہ نمبرنگ پیٹرن، واٹر مارک اور سیکوریٹی تھریڈ کو بھی مضبوط کیا جائے گا۔ اس کے جاری ہونے کے ساتھ ہی مارکیٹ میں لین دین کے لیے پرانے اور نئے دونوں ہی نوٹوں کا استعمال کیا جا سکے گا۔ یعنی کہ نئے نوٹ آنے کے بعد بھی پرانے نوٹوں کو بدلنے یا بینک میں جمع کرانے کی ضرورت نہیں پڑے گی۔ نئے نوٹوں کی تقسیم بینک اور اے ٹی ایم کے ذریعہ کی جائے گی۔

آر بی آئی ضابطہ 1934 کے التزامات کے مطابق ریزرو بینک کی طرف سے جاری کیے گئے سبھی نوٹ جب تک چلن سے واپس نہیں لیے جاتے، تب تک ہندوستان میں لین-دین کے لیے پوری طرح سے قبول ہوں گے۔ اس کے علاوہ حکومت ہند کے ذریعہ جاری کیے گئے 1 روپے کے نوٹ بھی ایک لیگل ٹینڈر (جائز کرنسی) ہیں۔

بینک نوٹ چھاپنے کا کام چار پرنٹنگ پریس میں ہوتا ہے۔ ان میں سے دو حکومت ہند کے ذریعہ بھارتیہ پرتیبھوتی مُدرن اور مُدرا نرمان نگم لمیٹیڈ کے ذریعہ آپریٹ کیے جاتے ہیں۔