آر بی آئی نے مودی حکومت کو پہنچائی راحت، 1.76لاکھ کروڑ روپے دینے کا کیا فیصلہ

ریزرو بینک آف انڈیا (آر بی آئی)نے آخر کار وہ فیصلہ لے لیا جس سے مرکزی حکومت کو تھوڑی راحت مل سکتی ہے ۔ آر بی آئی نے مرکزی حکومت کو 1.76لاکھ کروڑ روپے ٹرانسفر کرنے کا فیصلہ لیا ہے ۔ کل آر بی آئی کے مرکزی بورڈ نے اپنے اجلاس میں آر بی آئی کے سابق گورنر بمل جالان کی صدارت میں بنی کمیٹی کی سفارشات کو منظوری دے دی ۔

جالان کمیٹی کی سفارشات پر غور کرنے کے بعد آر بی آئی بورڈ کے اجلاس میں آر بی آئی نے 1,76,051 کروڑ روپے مرکزی حکومت کو ٹرانسفر کرنے کا فیصلہ لیا ہے ۔ اس رقم کے ٹرانسفر سے حکومت کے فسکل ڈیفیسٹ کو کم کرنے میں کوئی راحت نہیں ملے گی البتہ اتنی بڑی رقم حکومت کو مل جانے کے بعد مارکیٹ میں اعتماد بحال ہوگا اور آنے والے تیوہار کے سیز ن میں مندی کی مار کچھ کم محسوس ہوگی ۔ ماہرین کا کہنا ہے کہ اس کے دیر پا نتائج اچھے نہیں ہوں گے کیونکہ حکومت آر بی آئی پر دباؤ بنانے میں کامیاب ہو گئی ہے ۔

واضح رہے گزشتہ سال ارجت پٹیل نے آر بی آئی کے گورنر کا عہدہ چھوڑ دیا تھا لیکن وہ حکومت کے دباؤ میں نہیں آئے تھے اور انہوں نے آر بی آئی کا سرپلس حکومت کو ٹرانسفر کرنے سے اتفاق نہیں کیا تھا۔ ماہرین کا ماننا ہے کہ حکومت کو وقتی راحت دینے کے لئے آر بی آئی نے اپنے اصولوں اور مستقبل سے سمجھوتہ کیا ہے ۔

بمل جالان کمیٹی نے اپنی رپورٹ گزشتہ جمعہ کو ہی آر بی آئی گورنر شکتی کانت داس کو سونپ دی تھی ۔ واضح رہے شکتی کانت داس آر بی آئی کے وہ گورنر ہیں جن کا بیک گراؤنڈ اکنامکس کا نہیں ہے اس لئے ارجت پٹیل کے بعد جب آر بی آئی کے گورنر کی ذمہ داری انہیں دی گئی تھی تو اس وقت کچھ ماہرین کا کہنا تھا کہ اب حکومت کو آر بی آئی سے سرپلس پیسہ ملنے میں کوئی دشواری نہیں آئے گی ۔ حکومت کو موجودہ اقتصادی مندی سے نمتٹے کے لئے کچھ بڑے اقدامات لینے ہوں گے کیونکہ عالمی اقصادی بحران کے ساتھ ساتھ قومی معیشت پر نوٹ بندی اور جی ایس ٹی کے اثرات ابھی تک بہت واضح ہیں ۔