رامپور: اعظم خان کے خلاف گواہ کو دھمکانے کا مقدمہ درج

رامپور: سماج وادی پارٹی (ایس پی) کے سینئر لیڈر و ایم ایل اے محمد اعظم خان کے خلاف رام پور پولیس نے گواہ کو دھمکانے کا مقدمہ درج کیا ہے۔ پولیس ذرائع نے بدھ کو بتایا کہ رامپور میں آج اعظم خان کے کیس میں گواہی ہونی تھی۔ اس مقدمے کے مدعی اور گواہ، گواہی دینے سے پہلے کوتوالی تھانے پہنچ گئے اور انہوں نے اعظم خان سمیت چھ افراد کے خلاف اس کے گھر پہنچ کر دھمکانے کا الزام لگاتے ہوئے مقدمہ درج کروایا ہے۔

پولیس ذرائع نے بتایا کہ محلہ بیریان باشندہ ننہے کا کہنا ہے کہ اعظم کے کیس میں وہ مدعی اور گواہ ہیں۔ آج صبح اس کے گھر پر تقریباً پانچ نامعلوم افراد پہنچے اور انہوں نے کہا کہ اعظم خان کے کیس میں آج تمہاری گواہی ہے۔ تم صحیح گواہی نہیں دو گے۔ ساتھ ہی گواہی نہیں دینے کے لئے اس کو دھمکایا اور پھر دھمکی دے کر فرار ہوگئے۔ تحریر میں کہا گیا کہ ملزمین کو سامنے آنے پر وہ انہیں پہچان لے گا۔

ننہے نے تحریر میں الزام لگایا ہے کہ اعظم خان کی دہشت کے آگے کوئی نہیں بول سکتا۔ لہذا اس کی جانچ کرائی جائے۔ پولیس نے اعظم خان و دیگر پانچ افراد کے خلاف مقدمہ درج کر تفتیش کا آغاز کر دیا ہے۔ ایس پی لیڈر کے خلاف ایک اور مقدمہ درج ہونے سے ان کی مشکلیں اور بڑھتی نظر آرہی ہیں۔

اعظم خان کے خلاف پہلے ہی تقریباً 90 مقدمے درج ہیں۔ جس میں لگاتار سماعت چل رہی ہے۔ اعظم خان ان مقدموں میں ضمانت پر رہا ہیں۔ ننہے، اعظم خان کے خلاف کرائم نمبر 528/2019 میں دفعات 452،389،427،448،395،504،120 بی آئی پی سی کے تحت درج مقدمے کے مدعی ہیں۔