’روکا گیا پانی آخر کہاں گیا؟‘ سندھ آبی معاہدہ پر کانگریس نے مرکزی حکومت سے پوچھا سوال
رندھیر جیسوال کے بیانات پر ردعمل ظاہر کرتے ہوئے پنجاب کانگریس کے رکن پارلیمنٹ امرندر سنگھ راجہ وڈنگ نے کہا کہ وہ پوری طرح ملک کے مفاد اور ہندوستان کے موقف کے ساتھ کھڑے ہیں۔
پنجاب سے کانگریس رکن پارلیمنٹ امرندر سنگھ راجہ وڈنگ نے سندھ آبی معاہدہ، پی سی ایس کے اہم امتحان کے تنازعہ اور کانگریس کی انصاف ریلی کے معاملے پر مرکز اور پنجاب حکومت کو نشانہ بنایا ہے۔ انہوں نے سندھ آبی معاہدہ کے معاملے پر مرکز کی مودی حکومت کے موقف کی حمایت کی، لیکن ساتھ ہی سوال اٹھایا کہ اگر حکومت نے پانی روکنے کا دعویٰ کیا ہے تو آخر وہ پانی گیا کہاں؟
وزارت خارجہ کے ترجمان رندھیر جیسوال کے بیانات پر ردعمل ظاہر کرتے ہوئے پنجاب کانگریس کے رکن پارلیمنٹ امرندر سنگھ راجہ وڈنگ نے کہا کہ وہ پوری طرح ملک کے مفاد اور ہندوستان کے موقف کے ساتھ کھڑے ہیں۔ ملک کے معاملے میں ان کی حمایت حکومت ہند کے ساتھ ہے، لیکن ان کا سوال ہے کہ پانی روکنے کے بعد اسے کہاں موڑا گیا؟ انہوں نے کہا کہ جس مقام سے پانی روکنے کی بات کہی جارہی ہے، وہاں سے اسے روکنے کے بعد آگے کہاں بھیجا گیا، یہ واضح ہونا چاہیے۔ پانی اب بھی اسی سمت میں بہہ رہا ہے۔ حکومت نے کاغذوں پر پانی روکنے کا دعویٰ تو کیا ہے، لیکن یہ بتانا ضروری ہے کہ دریائے سندھ کے پانی کا رخ موڑ کر اسے کہاں پہنچایا گیا ہے۔
دوسری جانب پی سی ایس کے اہم امتحان کے تنازعہ پر راجہ وڈنگ نے پنجاب حکومت اور پولیس انتظامیہ پر سنگین الزامات عائد کیے۔ انہوں نے کہا کہ پوری کارروائی منمانی طریقے سے کی جا رہی ہے۔ انہوں نے پنجاب کے ایس ایس پی کو نشانہ بناتے ہوئے کہا کہ وہ وزیر اعلیٰ بھگونت مان کے ایک کلرک کی طرح کام کر رہے ہیں۔ وڈنگ کے مطابق ایک نوجوان ساتھی کے معاملے میں ہائی کورٹ نے روک لگائی ہے، جو پی سی ایس امتحانات میں بے ضابطگیوں کی طرف اشارہ کرتی ہے۔ کانگریس عدلیہ کا احترام کرتی ہے اور یہ بھی سمجھتی ہے کہ جمہوریت میں احتجاج کرنا ہر شہری کا جائز حق ہے۔
راجہ وڈنگ نے ریاستی کانگریس صدر کو حراست میں لیے جانے کی بھی مذمت کی اور اسے غلط کارروائی قرار دیا۔ کانگریس کی ’انصاف ریلی‘ کے تعلق سے وڈنگ نے کہا کہ پارٹی کی ’انصاف مارچ‘ مہم پنجاب کے مختلف شہروں اور قصبوں میں جاری رہے گی۔ اس کی شروعات سنٹرل اسمبلی حلقہ سے کی جا رہی ہے۔ انہوں نے بتایا کہ پورے پنجاب میں کہیں سائیکل یاترائیں نکالی جا رہی ہیں تو کہیں ’پنجاب منگدا انصاف‘ مہم چلائی جا رہی ہے۔ انتخابات قریب آنے کے ساتھ کانگریس عوامی مسائل کو لے کر ریاست بھر میں اس طرح کے پروگرام منعقد کر رہی ہے۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔
