دہلی، یوپی، بہار میں بارش کو لے کر الرٹ، شمالی مشرقی ریاستوں میں جاری رہے گا بارش کا قہر!

موسم میں آئی تبدیلی سے ملک کے کچھ حصوں میں راحت ملی ہے تو کئی علاقوں میں آفت آ ئی ہوئی ہے۔ شمالی ہند کی کئی ریاستوں میں بارش سے لوگوں کو شدید گرمی سے نجات ملی ہے وہیں شمالی مشرقی ریاستوں میں شدید بارش اور لینڈ سلائیڈ سے تباہی کا دور جاری ہے۔ اس درمیان محکمہ موسمیات نے دہلی، یوپی اور بہار میں بھی بارش کو لے کر الرٹ جاری کر دیا ہے۔

دہلی اور اتر پردیش میں گزشتہ کچھ دنوں میں ہلکی بارش اور آندھی سے موسم میں کچھ تبدیلی ہوئی تھی۔ اس کے بعد تیز دھوپ نے پھر سے موسم کو تلخ کر دیا۔ محکمہ موسمیات کے مطابق دہلی میں آج آندھی کے ساتھ بارش ہونے کے آثار نظر آ رہے ہیں۔ بارش کے بعد درجہ حرارت میں قریب 5 سے 7 ڈگری سیلسیس تک کی گراوٹ دیکھی جا سکتی ہے۔ وہیں اتر پردیش میں بھی بارش کو لے کر الرٹ جاری کیا گیا ہے۔ جبکہ مدھیہ پردیش میں اگلے دو دنوں تک موسم صاف رہنے کا امکان ہے۔

شمال مشرقی ریاستوں کی بات کی جائے تو منی پور اور آسام میں آج بھی بارش کا قہر جاری رہے گا۔ ان علاقوں میں سیلاب سے کافی نقصان ہوا ہے۔ آسام، منی پور اور سکم میں کئی شہروں میں مسلسل بارش سے ندیاں طغیانی پر ہیں یہاں تک کہ لوگوں کے گھروں تک پانی داخل ہو چکا ہے۔ کئی گاؤں ڈوب گئے ہیں جبکہ شہروں میں سڑکوں پر گھٹنوں تک پانی بہہ رہا ہے۔ لوگوں کو محفوظ مقامات پر پہنچانے کے لیے ایس ڈی آر ایف اور فوج کی مدد بھی لی جا رہی ہے۔ آسام میں مرنے والوں کی تعداد 11 پہنچ گئی ہے جبکہ 5.5 لاکھ سے زیادہ افراد اس قدرتی آفت سے متاثر ہیں۔

دوسری طرف راجستھان کے کئی ضلعوں میں بھی آج موسم کروٹ لے سکتا ہے۔ جئے پور، الور، بھرت پور، سیکر، چُرو، بیکانیر، جودھپور، ادئے پور کوٹا سمیت کئی جگہوں پر بارش ہونے کے آثار ہیں۔ محکمہ موسمیات کے مطابق کچھ شہروں میں بھی ہلکی بارش کے بعد موسم سہانا ہوگا۔