راہل گاندھی کا اداکار وجے اور وزیر اعلیٰ اسٹالن کو فون، کرور حادثے پر اظہار غم، مہلوکین کو پیش کیا خراج عقیدت

تمل ناڈو کے کرور میں ٹی وی سربراہ اور اداکار وجے کی ریلی کے دوران ہوئی بھگدڑ میں مرنے والوں کی تعداد 40  ہو گئی ہے جبکہ 100 افراد زخمی ہوئے ہیں۔ اس حادثے سے پورے ملک میں غم کا ماحول ہے۔ اس درمیان لوک سبھا میں اپوزیشن رہنما راہل گاندھی نے اداکار تھالاپتی وجے سے فون پر بات کی ہے۔ ساتھ ہی راہل نے تمل ناڈو کے وزیر اعلیٰ ایم کے اسٹالن سے بھی فون پر بات کرکے حالات کا جائزہ لیا۔

کانگریس ذرائع کے مطابق راہل گندھی نے پہلے اداکار وجے سے فون پر بات کی۔ اپوزیشن رہنما نے اس دردناک حادثے پر اپنے گہرے صدمے کا اظہار کرتے ہوئے وجے کے حامیوں کو خراج عقیدت پیش کیا۔ اس کے بعد راہل نے وزیر اعلیٰ ایم۔ کے۔ اسٹالن کو فون ملایا اور حادثے کی پوری جانکاری حاصل کی۔

دوسری طرف وزارت داخلہ نے تمل ناڈو حکومت سے حادثے پر رپورٹ طلب کی ہے۔ وزیر اعلیٰ اسٹالن نے ہائی کورٹ کی سابق جسٹس ارونا جگدیشن کی صدارت میں پینل کی تشکیل کی ہے، جو بھگدڑ کی تفصیلی جانچ کرکے رپورٹ پیش کریں گی۔

واضح رہے کہ ہفتہ کی دیر شام کرور میں وجے کی ریلی منعقد کی گئی تھی۔ وجے 7 گھنٹے کی تاخیر سے ریلی کے مقام پر پہنچے تھے۔ اس دوران 10000 کی صلاحیت والی جگہ پر 30000 سے زیادہ لوگ جمع ہو گئے۔ وجے کی تقریر کے درمیان ہی بھگدڑ شروع ہو گئی اور ایک بڑا حادثہ رونما ہو گیا۔ اس واقعہ میں اب تک 40 لوگوں کی موت کی تصدیق ہوئی ہے جبکہ 100 سے زیادہ افراد زخمی بتائے جاتے ہیں۔