راہل گاندھی نے کی بھارت بند کی حمایت، مزدوروں اور کسانوں کے حق میں وزیر اعظم مودی سے سخت سوال

نئی دہلی: لوک سبھا میں قائد حزب اختلاف اور کانگریس کے سینئر رہنما راہل گاندھی نے 12 فروری یعنی آج ٹریڈ یونینوں کے بھارت بند کی حمایت کرتے ہوئے وزیر اعظم نریندر مودی پر شدید تنقید کی ہے۔ انہوں نے سوشل میڈیا پلیٹ فارم ایکس پر جاری اپنے بیان میں کہا کہ ملک بھر میں لاکھوں مزدور اور کسان اپنے حقوق کے لیے سڑکوں پر ہیں، مگر ان کی آواز کو نظر انداز کیا جا رہا ہے۔

راہل گاندھی کے مطابق مزدوروں کو اندیشہ ہے کہ چار نئے لیبر کوڈ ان کے بنیادی حقوق کو کمزور کر دیں گے۔ انہوں نے کہا کہ روزگار کے تحفظ، اجرت اور سوشل سکیورٹی سے متعلق خدشات بڑھ رہے ہیں۔ اسی طرح کسانوں کو یہ فکر ہے کہ ہند-امریکہ عبوری تجارتی معاہدہ ان کی روزی روٹی پر منفی اثر ڈال سکتا ہے۔

انہوں نے منریگا کا حوالہ دیتے ہوئے کہا کہ اگر اس اسکیم کو کمزور یا ختم کیا گیا تو دیہی علاقوں کا آخری سہارا بھی ختم ہو سکتا ہے۔ راہل گاندھی نے سوال اٹھایا کہ جب کسانوں اور مزدوروں کے مستقبل سے متعلق فیصلے لیے گئے تو ان کی رائے کیوں نہیں لی گئی۔ انہوں نے وزیر اعظم سے براہ راست سوال کیا کہ کیا وہ اب عوام کی آواز سنیں گے یا پھر کسی ’گرِپ‘ کی گرفت بہت مضبوط ہے۔

واضح رہے کہ سنیوکت کسان مورچہ اور کئی مرکزی ٹریڈ یونینوں نے ہند-امریکہ عبوری تجارتی معاہدے، مرکزی حکومت کی معاشی پالیسیوں اور نئے لیبر قوانین کے خلاف بھارت بند کی اپیل کی ہے۔ کسان تنظیموں کا کہنا ہے کہ یہ تحریک نیو لیبر کوڈ کی واپسی، بجلی بل 2025، بیج بل 2025، دیہی روزگار و آجیویکا مشن قانون 2025 کی منسوخی، پرانی پنشن اسکیم کی بحالی اور کم از کم اجرت کے نفاذ سمیت متعدد مانگوں پر مبنی ہے۔

ٹریڈ یونینوں کا دعویٰ ہے کہ منظم اور غیر منظم شعبوں کے لاکھوں مزدور اس ہڑتال میں شریک ہوں گے۔ کسان تنظیموں نے زرعی مزدور یونینوں اور نریگا سنگھرش مورچہ کی شمولیت کا بھی اعلان کیا ہے اور کسانوں سے اپیل کی ہے کہ وہ بڑی تعداد میں سڑکوں پر نکل کر صنعتی مزدوروں کے ساتھ یکجہتی کا اظہار کریں۔

راہل گاندھی نے کہا کہ وہ کسانوں اور مزدوروں کے مسائل اور ان کی جدوجہد کے ساتھ مضبوطی سے کھڑے ہیں اور ان کے حقوق کے تحفظ کے لیے اپنی آواز بلند کرتے رہیں گے۔