خراب موسم کی وجہ سے پی ایم مودی کا بھوٹان دورہ ملتوی

وزیر اعظم نریندر مودی کا بھوٹان کا دورہ ملتوی ہو گیا ہے، اس کی وجہ موسم کی خرابی بتائی جا رہی ہے۔ وزارت خارجہ کی جانب سے اس تعلق سے ایک بیان جاری کرتے ہوئے کہا گیا ہے کہ پی ایم مودی کا 21-22 مارچ کو بھوٹان کا دورہ وہاں خراب موسم کی وجہ سے ملتوی کر دیا گیا ہے، بہت جلد دورے کی نئی تاریخ کا اعلان کیا جائے گا۔

وزارت خارجہ کے بیان کے مطابق ’’پارو ہوائی اڈے پر خراب موسم کی وجہ سے وزیر اعظم مودی کے بھوٹان کے سرکاری دورے کو ملتوی کرنے کا متفقہ فیصلہ کیا گیا ہے۔ دونوں ممالک سفارتی ذرائع سے نئی تاریخوں پر غور کر رہے ہیں۔‘‘ واضح رہے کہ پی ایم مودی 21-22 مارچ کو بھوٹان کا سرکاری دورہ کرنے والے تھے۔ اس دوران وزیر اعظم کو بھوٹان کے بادشاہ جگمے کھیسر نامگیال وانگچک اور ان کے والد جگمے سنگیے وانگچک (بھوٹان کے سابق بادشاہ) سے ملاقات کرنی تھی۔ اس کے علاوہ پی ایم مودی کو اپنے بھوٹانی ہم منصب شیرنگ ٹوبگے سے بھی بات کرنی تھی۔

وزیر اعظم مودی کے دورے کے بارے میں وزیر اعظم کے دفتر (پی ایم او) نے کہا تھا کہ یہ دورہ ہندوستان اور بھوٹان کے درمیان باقاعدہ ہونے والی اعلیٰ سطحی تبادلوں کی روایت اور ‘پڑوسی اول کی پالیسی‘ پر زور دینے کی حکومت کی کوششوں کے مطابق ہے۔ پی ایم او نے کہا کہ پی ایم مودی کا یہ دورہ دونوں ممالک کے درمیان باہمی دلچسپی کے دو طرفہ اور علاقائی امور پر تبادلہ خیال کرنے کے لیے ہے۔ اسی کے ساتھ دونوں ممالک کے عوام کے فائدے کے لیے ہماری مثالی شراکت داری کو وسعت دینے اور مضبوط کرنے کے طریقوں پر تبادلہ خیال کرنے کا موقع بھی فراہم کرے گا۔