’ممبئی کے عوام نے آئینہ دکھایا‘، شیوسینا یو بی ٹی رکن پارلیمنٹ پرینکا چترویدی نے ایکناتھ شندے کو بنایا ہدف تنقید

مہاراشٹر میں حال ہی میں مکمل ہونے والے برہان ممبئی میونسپل کارپوریشن (بی ایم سی) انتخاب کے نتائج نے سیاست کی نئی مساوات بنا دی ہیں۔ شیو سینا (شندے) کے صرف 29 امیدوار کامیاب ہوئے، جس کے بعد وہ شیو سینا (یو بی ٹی) کے نشانے پر آگئے ہیں۔ پارٹی کی رکن پارلیمنٹ پرینکا چترویدی نے ایکناتھ شندے پر طنز کستے ہوئے کہا کہ ’’جب وزیر اعلیٰ کے انتخاب کا وقت آیا تھا تب بھی اسی طرح کی کشمکش چل رہی تھی۔ ممبئی کے عوام نے بتا دیا ہے کہ اصل شیو سینا کون ہے۔‘‘

واضح رہے کہ شیوسینا (شندے) نے بی جے پی کے سامنے ڈھائی ڈھائی سال کے میئر کی شرط رکھی ہے۔ بی جے پی 89 سیٹ جیت کر سب سے بڑی پارٹی بنی ہے، جبکہ مہایوتی میں شامل شیوسینا (شندے) کے صرف 29 امیدوار ہی کامیاب ہوئے ہیں۔ ایکناتھ شندے نے اپنے تمام امیدواروں کو ایک ریزورٹ میں رکھا ہوا ہے، جس کے بعد وہ اب اپوزیشن کے نشانے پر آ گئے ہیں۔

شیوسینا (یو بی ٹی) کی رکن پارلیمنٹ پرینکا چترویدی نے نامہ نگاروں سے بات کرتے ہوئے مہاراشٹر کے بلدیاتی انتخاب کے متعلق کہا کہ ’’جب وزیر اعلیٰ منتخب کرنے کا وقت آیا تھا تب بھی اسی طرح کی کشمش چل رہی تھی۔ ایکناتھ شندے کو جب نائب وزیر اعلیٰ کی ذمہ داری ملی تھی تب بھی وہ ناراض دکھائی دے رہے تھے۔‘‘ انہوں نے مزید کہا کہ ’’29 سیٹ اس پارٹی کی آئی ہے جس نے ہماری پارٹی کو توڑا۔ ممبئی کے عوام نے انہیں آئینہ دکھایا اور بتایا کہ اصل شیوسینا کون سی ہے۔ حقیقت سب جانتے ہیں کہ ایکناتھ شندے کے پاس کوئی راستہ نہیں بچا ہے بجائے اس کہ وہ اس اتحاد کے ساتھ ہی آگے بڑھیں۔‘‘

قابل ذکر ہے کہ بی ایم سی انتخاب میں ایکناتھ شندے کو بڑا جھٹکا لگا اور مہایوتی اتحاد میں انہیں کافی نقصان اٹھانا پڑا، بی جے پی کے 89 کونسلروں کے مقابلے ان کے صرف 29 کونسلر ہی کامیاب ہو سکے۔ ایکناتھ شندے نے بیان جاری کرتے ہوئے کہا ہے کہ وہ کنگ میکر کے کردار میں ہیں، اس لیے میئر کی مدت ڈھائی ڈھائی سال ہونی چاہیے۔ یہی نہیں انہوں نے اپنے جیتے ہوئے کونسلروں کو ایک ریزورٹ میں منتقل کر دیا ہے۔ جبکہ بی جے پی ڈھائی ڈھائی سال کے فارمولے پر تیار نہیں ہے، اس نے اس بار اپنا میئر بنانے کا پختہ ارادہ کر رکھا ہے۔