پنڈت نہرو کی برسی: سونیا گاندھی کی شانتی ون میں حاضری، راہل گاندھی اور کھڑگے نے پیش کیا خراجِ عقیدت

نئی دہلی: آزاد ہندوستان کے پہلے وزیراعظم پنڈت جواہر لال نہرو کی 61ویں برسی کے موقع پر کانگریس کی پارلیمانی پارٹی چیئرپرسن سونیا گاندھی نے پیر کے روز دہلی کے شانتی ون میں جا کر انہیں خراجِ عقیدت پیش کیا۔ اس موقع پر انہوں نے خاموشی سے گلپوشی کرتے ہوئے نہرو کی خدمات کو یاد کیا۔ سونیا گاندھی کی موجودگی کی تصاویر میں وہ احتراماً جھکی ہوئی نظر آئیں۔

شانتی ون میں یہ تقریب ہر سال 27 مئی کو پنڈت نہرو کی برسی پر منعقد کی جاتی ہے، جس میں کانگریس کی اعلیٰ قیادت سمیت پارٹی کارکنان اور حامی شریک ہوتے ہیں۔ دریں اثنا، لوک سبھا میں قائد حزب اختلاف راہل گاندھی اور کانگریس صدر ملکارجن کھڑگے نے سوشل میڈیا پلیٹ فارمز پر بھی نہرو کو یاد کرتے ہوئے اپنے بیانات جاری کیے۔

راہل گاندھی نے اپنی ایکس (سابقہ ٹوئٹر) پوسٹ میں لکھا، "ہندوستان کے پہلے وزیراعظم پنڈت جواہر لال نہرو کو ان کی برسی پر سلام۔ طاقتور اور شمولیت پر مبنی ہندوستان کا خواب لیے، نہرو جی نے اپنی دوراندیش قیادت سے آزاد ہندوستان کی مضبوط بنیاد رکھی۔‘‘

انہوں نے مزید کہا کہ سماجی انصاف، تعلیم، آئین اور جمہوریت کے قیام میں نہرو کا کردار ناقابلِ فراموش ہے۔ راہل گاندھی نے نہرو کو ’ہند کے جواہر‘ قرار دیتے ہوئے کہا کہ ان کی وراثت اور اقدار ہمیشہ رہنمائی کرتی رہیں گی۔

دوسری جانب کانگریس صدر ملکارجن کھڑگے نے بھی نہرو کو خراجِ عقیدت پیش کرتے ہوئے لکھا: ’’پنڈت جواہر لال نہرو کے بغیر 21ویں صدی کے بھارت کا تصور ممکن نہیں۔ وہ جدید ہندوستان کے معمار، جمہوریت کے نڈر محافظ اور سائنسی، اقتصادی و صنعتی ترقی کے بانی تھے۔‘‘ کھڑگے نے نہرو کا حوالہ دیتے ہوئے ان کے ایک معروف قول کو بھی شیئر کیا، ’’شہریت، ملک کی خدمت میں ہوتی ہے‘‘۔

کانگریس کے سرکاری ہینڈل سے بھی مختلف پوسٹوں کے ذریعے پنڈت نہرو کے وژن، قیادت اور خدمات کو یاد کیا گیا۔ ایک پوسٹ میں لکھا گیا، "قوم پنڈت نہرو کو ان کے دور اندیش وژن کے لیے عزت و احترام سے یاد کرتی ہے۔"

نہرو کو ہندوستانی جمہوریت، سیکولرازم، سائنسی فکر، اور سماجی انصاف کے ستون کے طور پر تسلیم کیا جاتا ہے۔ ان کی قائم کردہ ادارے، جیسے آئی آئی ٹی، ایمس، اور منصوبہ بندی کمیشن، آج بھی ان کے وژن کی جھلک پیش کرتے ہیں۔ اس موقع پر کانگریس نے موجودہ سیاسی ماحول میں نہرو کے نظریات اور وراثت کو مزید مستحکم کرنے کا عزم ظاہر کیا اور اس بات پر زور دیا کہ ان کے افکار محض تاریخ نہیں بلکہ آج کے دور میں بھی ایک عملی رہنما اصول ہیں۔