یوگی کے خلاف الیکشن لڑنے کا اعلان کرنے والے امیتابھ ٹھاکر پر اپوزیشن فدا

لکھنؤ: اترپردیش کے وزیراعلیٰ یوگی آدتیہ ناتھ کے خلاف اگلا اسمبلی الیکشن لڑنے کااعلان کرنے والے سابق آئی پی ایس افسر امیتابھ ٹھاکر پر اپوزیشن فدانظرآرہا ہے۔ سہیل دیو بھارتیہ سماج پارٹی (ایس بی ایس پی) اورپیس پارٹی نے امیتابھ ٹھاکر کو حمایت دینے کا باضابطہ اعلان بھی کر دیا ہے۔ پیس پارٹی کے صدر ڈاکٹر محمد ایوب نے ایک ٹوئٹ کیا ہے جس میں لکھا ہے کہ ’’اگر امیتابھ ٹھاکر مسٹر یوگی آدتیہ ناتھ کے خلاف اسمبلی کاالیکشن آزادانہ لڑتے ہیں توپیس پارٹی غیرمشروط حمایت اورتعاون دے گی۔‘‘

دوسری طرف ایس بی ایس پی کے قومی چیف جنرل سکریٹری اروند راجبھر نے بھی امیتابھ ٹھاکر کی حمایت کا اعلان کرتے ہوئے اپنے فیس بک وال پر لکھا ہے کہ ’’اتر پردیش کے وزیر اعلی یوگی آدتیہ ناتھ کے خلاف اسمبلی انتخابات لڑنے کا اعلان کرنے والے سابق آئی پی ایس افسر امیتابھ ٹھاکر اور ان کی اہلیہ سماجی کارکن نوتن ٹھاکرسے ان کی رہائش گاہ پر پارٹی کے ترجمان کنور اجے سنگھ نے ملاقات کر کے ایس بی ایس پی کی پالیسیوں سے آگاہ کرایا اورپارٹی میں شمولیت کی دعوت دی گئی۔‘‘

واضح رہے کہ چند دنوں قبل ہی سابق آئی پی ایس افسر امیتابھ ٹھاکر نے وزیر اعلیٰ یوگی آدتیہ ناتھ کے خلاف اسمبلی الیکشن میں کھڑے ہونے کا اعلان کرتے ہوئے کہا تھا کہ وہ جس بھی اسمبلی حلقہ سے قسمت آزمائی کریں گے، وہیں سے میں بھی اپنا پرچہ نامزدگی داخل کروں گا۔ ساتھ ہی امیتابھ ٹھاکر نے کہا تھا کہ ’’وزیر اعلیٰ یوگی آدتیہ ناتھ نے اپنی مدت کار میں تمام غیر جمہوری، شرپسندی، استحصال پر مبنی، مظالم ڈھانے والے اور تقسیم کرنے والے کام کیے۔ میں اس کی مخالفت میں وزیر اعلیٰ کے خلاف انتخاب لڑوں گا، پھر چاہے آدتیہ ناتھ جہاں سے بھی الیشکن لڑیں۔‘‘ امیتابھ ٹھاکر نے مزید کہا کہ ’’یہ میرے لیے اصولوں کی لڑائی ہے، میں اس میں غلط کے خلاف اپنا احتجاج ظاہر کروں گا۔‘‘