سری نگر میں تصادم، ایک ملی ٹنٹ ہلاک، آپریشن جاری: آئی جی کشمیر

سری نگر: جموں وکشمیر کے گرمائی دارلخلافہ سری نگر کے بشمبر نگر خانیارعلاقے میں سیکورٹی فورسز اور ملی ٹنٹوں کے مابین تصادم آرائی میں ایک ملی ٹنٹ مارا گیا، جبکہ اُس کا ساتھی علاقے میں پھنس کر رہ گیا ہے جس کو مار گرانے کی خاطر اضافی اہلکاروں کی تعیناتی عمل میں لائی گئی ہے آئی جی کشمیر کے مطابق سری نگر میں سی آر پی ایف اہلکاروں پر ہوئے حملے میں مہلوک ملی ٹنٹ کا ہاتھ تھا۔

پولیس ذرائع نے یو این آئی اردو کو بتایا کہ سری نگر کے بشمبر نگر خانیار علاقے میں ملی ٹینٹوں کے چھپے ہونے کی اطلاع ملتے ہی سیکورٹی فورسز اور پولیس نے مشترکہ طورپر پورے علاقے کو محاصرے میں لے لیا اور اُنہیں ڈھونڈ نکالنے کے لئے گھر گھر تلاشی کارروائی شروع کی۔ انہوں نے بتایا کہ جونہی سیکورٹی فورسز کے اہلکار ایک مشتبہ مقام کے نزدیک پہنچے تو وہاں پر موجود ملی ٹنٹوں نے اندھا دھند فائرنگ شروع کر دی۔

پولیس ذرائع کے مطابق حفاظتی عملے نے بھی پوزیشن سنبھال کر جوابی کارروائی کا آغاز کیا اور ابتدائی گولیوں کے تبادلے میں ایک ملی ٹنٹ مارا گیا جس کی شناخت اور تنظیمی وابستگی کے بارے میں جانچ پڑتال شروع کر دی گئی ہے۔ انہوں نے کہا کہ علاقے میں اور ایک ملی ٹنٹ موجود ہے۔ دریں اثنا آئی جی کشمیر وجے کمار نے بتایا کہ سری نگر کے بشبمر نگر علاقے میں تلاشی آپریشن کے دوران ملی ٹنٹوں نے فورسز پر فائرنگ کی، جوابی کارروائی میں ایک ملی ٹنٹ مارا گیا۔

انہوں نے بتایا کہ گزشتہ روز سری نگر میں سی آر پی ایف اہلکاروں پر ہوئے حملے میں مہلوک ملی ٹنٹ کا ہاتھ تھا۔ آئی جی کشمیر کے مطابق علاقے میں آپریشن ہنوز جاری ہے کیونکہ مہلوک ملی ٹینٹ کا ساتھی پھنس کر رہ گیا ہے۔ آخری اطلاعات موصول ہونے تک علاقے میں رک رک کر گولیوں کا تبادلہ جاری تھا۔ اس سلسلے میں مزید تفصیلات کا انتظار ہے۔