مرادآباد کے ایک ریستوران میں زبردست آگ لگنے سے ایک خاتون کی موت

اتر پردیش کے مراد آباد میں کل رات دیر گئے ایک ریستوران میں زبردست آگ بھڑک اٹھی جو تیزی سے اوپر والے گھر تک پھیل گئی۔خبروں کے مطابق واقعے میں ایک خاتون جاں بحق جب کہ متعدد افراد زخمی ہوگئے ہیں۔ بتایا جاتا ہے کہ آگ لگنے کے بعد چار گیس سلنڈر پھٹ گئے جس سے آگ مزید بھڑک اٹھی۔

مرادآباد ڈسٹرکٹ اسپتال کے ایمرجنسی میڈیکل آفیسر ڈاکٹر جنید انصاری نے کہا، "کل سات مریضوں کو یہاں لایا گیا تھا۔ ان میں سے ایک 56 سالہ  کومردہ لایا گیا تھا، باقی مریضوں کی حالت مستحکم ہے۔‘‘ فائر ڈیپارٹمنٹ کو رات 10 بجے کے قریب آگ لگنے کی اطلاع ملی۔ فائر بریگیڈ کی کئی گاڑیاں جائے وقوعہ پر پہنچیں اور آگ پر قابو پایا۔

مرادآباد کے چیف فائر آفیسر راجیو کمار پانڈے نے کہا، "ہمیں رات 10 بجے کے قریب کال موصول ہوئی کہ کلارکس ان ہوٹل کے سامنے واقع ایک ریستوراں میں آگ لگ گئی ہے۔ ابتدائی طور پر دو فائر ٹینڈر بھیجے گئے تھے، لیکن چار سلنڈر پھٹ گئے، جس سے آگ تیزی سے پھیل گئی۔ ‘‘

فائر آفیسر کا کہنا تھا کہ کئی افراد بالائی منزل پر پھنسے ہوئے تھے جنہیں بڑی مشکل سے نکالا گیا۔ انہوں نے کہا، "ہم نے تقریباً 16 لوگوں کو بحفاظت بچا لیا، جن میں چار خواتین، دو بچے اور ایک کتا شامل تھا۔" انہوں نے مزید کہا کہ آگ لگنے کی وجہ ابھی واضح نہیں ہے۔

مرادآباد کے ایس پی سٹی کمار رنوجے سنگھ نے کہا، "یہ واقعہ کٹگھر تھانے کے علاقے میں پیش آیا۔ آگ لگنے کے وقت ریستوراں میں تقریباً 15-16 لوگ موجود تھے۔ سبھی کو بحفاظت باہر نکال کر اسپتال لے جایا گیا، اس وقت کسی کے زخمی ہونے کی اطلاع نہیں ہے، لیکن بعد میں ایک شخص کی موت کی تصدیق کی گئی"۔ (بشکریہ نیوز پورٹل ’آج تک‘)