’دہلی-این سی آر میں عنقریب گرمی سے کوئی راحت نہیں‘

نئی دہلی: ہندوستانی محکمہ موسمیات (آئی ایم ڈی) نے کہا ہے کہ دہلی-این سی آر میں رہنے والے لوگوں کے لئے چلچلاتی گرمی سے ابھی راحت کا کوئی امکان نہیں ہے۔ محکمہ نے اندازہ لگایا ہے کہ 3 اپریل سے درجہ حرارت میں مزید اضافہ ہوگا اور بدھ 6 اپریل کو اس کے 42 ڈگری سیلسیس تک پہنچنے کا امکان ہے۔

محکمہ موسمیات کے مطابق فی الحال راجدھانی کا آسمان صاف رہنے کا امکان ہے اور اس دوران 20 سے 30 کلومیٹر فی گھنٹہ کی رفتار سے ہوائیں چلیں گی۔ ایک روز قبل زیادہ سے زیادہ درجہ حرارت 39.5 ڈگری سیلسیس کے قریب ریکارڈ کیا گیا، جو معمول سے چھ ڈگری زیادہ ہے۔ اس دوران کم از کم درجہ حرارت بھی 20.1 ڈگری سیلسیس ریکارڈ کیا گیا جو کہ معمول سے دو ڈگری زیادہ ہے۔

محکمہ موسمیات کے حکام کا کہنا ہے کہ 3 سے 6 اپریل تک کئی دور دراز علاقوں میں خشک سالی کے باعث شدید گرم موسم جاری رہے گا۔ آئی ایم ڈی نے ٹویٹ کر کے بتایا کہ ہندوستان کے شمال مغربی، وسطی اور مغربی ہندوستان میں اگلے چار سے پانچ دنوں کے دوران گرمی کی لہر میں شدت کا امکان ہے۔ تاہم یکم اپریل 2022 سے شمال مغربی ہندوستان میں گرمی کی لہر کی شدت میں کمی آنا شروع ہو جائے گی۔محکمہ کے مطابق دہلی میں مارچ کے آغاز سے لے کر 31 مارچ تک دن کے درجہ حرارت میں 14 ڈگری سیلسیس کا اضافہ ہوا ہے۔