ایل پی جی ری فل بُکنگ کے قواعد میں کوئی تبدیلی نہیں، عوام افواہوں سے بچیں: وزارت پٹرولیم

نئی دہلی: پٹرولیم و قدرتی گیس کی وزارت نے ایل پی جی سلنڈر کی ری فل بُکنگ کے حوالے سے سوشل میڈیا پر گردش کرنے والی خبروں کو گمراہ کن قرار دیتے ہوئے واضح کیا ہے کہ بُکنگ کی مدت میں کسی بھی طرح کی کوئی تبدیلی نہیں کی گئی ہے اور پہلے سے جاری نظام ہی نافذ العمل ہے۔

وزارت کی جانب سے جاری بیان میں کہا گیا ہے کہ کچھ خبروں اور سوشل میڈیا پوسٹس میں یہ دعویٰ کیا جا رہا تھا کہ پردھان منتری اُجولا یوجنا کے تحت صارفین کے لیے 45 دن، جبکہ نان اُجولا سنگل سلنڈر کنکشن کے لیے 25 دن اور ڈبل سلنڈر کے لیے 35 دن کی نئی مدت مقرر کی گئی ہے۔ وزارت نے ان تمام دعووں کو بے بنیاد اور حقیقت کے منافی قرار دیا ہے۔

حکام کے مطابق موجودہ اصولوں کے تحت ایل پی جی ری فل بُکنگ کی مدت شہری علاقوں میں 25 دن اور دیہی علاقوں میں 45 دن ہی ہے، اور یہی اصول تمام اقسام کے کنکشن پر یکساں طور پر نافذ ہوتے ہیں۔ اس حوالے سے کسی نئی پالیسی یا ترمیم کا اعلان نہیں کیا گیا۔

وزارت نے عوام سے اپیل کی ہے کہ وہ غیر مصدقہ خبروں پر یقین نہ کریں اور نہ ہی انہیں آگے پھیلائیں۔ ساتھ ہی یہ بھی کہا گیا ہے کہ گھبراہٹ میں غیر ضروری طور پر گیس سلنڈر کی بُکنگ کرنے سے گریز کیا جائے تاکہ سپلائی کا نظام متاثر نہ ہو۔

بیان میں مزید بتایا گیا ہے کہ ملک میں ایل پی جی کا وافر ذخیرہ موجود ہے اور کسی قسم کی قلت کی صورتحال نہیں ہے۔ حکومت نے یقین دہانی کرائی ہے کہ تمام ریفائنریاں اپنی مکمل صلاحیت کے ساتھ کام کر رہی ہیں اور سپلائی کا نظام پوری طرح مستحکم ہے۔

پٹرولیم و قدرتی گیس کی وزارت کی مشترکہ سکریٹری سجاتا شرما کے مطابق ملک بھر میں پٹرول اور ڈیزل کا بھی خاطر خواہ ذخیرہ دستیاب ہے اور ایک لاکھ سے زائد پٹرول پمپ معمول کے مطابق کام کر رہے ہیں۔ اس کے علاوہ پائپڈ نیچرل گیس کنکشن میں بھی تیزی سے اضافہ کیا جا رہا ہے اور ایک ہی دن میں ہزاروں نئے کنکشن فراہم کیے گئے ہیں۔

حکومت کا کہنا ہے کہ ایل پی جی کی سپلائی کو مزید مضبوط بنانے کے لیے مسلسل اقدامات کیے جا رہے ہیں اور مختلف ریاستوں کو ہدایت دی گئی ہے کہ وہ نگرانی کے نظام کو بہتر بنائیں تاکہ عوام کو کسی بھی قسم کی دشواری کا سامنا نہ کرنا پڑے۔