وزیر اعلیٰ رہائش خالی کر رہے نتیش کمار، نئے پتہ پر منتقل ہونے لگے سامان

بہار کے وزیر اعلیٰ نتیش کمار اب راجیہ سبھا کے رکن بن گئے ہیں اور وہ جلد ہی بہار کے وزیر اعلیٰ عہدہ سے استعفیٰ دے دیں گے۔ یہی وجہ ہے کہ نتیش کمار کا سامان وزیر اعلیٰ رہائش سے ان کے نئے پتہ پر منتقل ہونا شروع ہو گیا ہے۔ نتیش کمار جب بھی وزیر اعلیٰ کی رہائش گاہ چھوڑتے ہیں تو 7 سرکولر روڈ میں ہی قیام کرتے ہیں۔ گزشتہ کئی دنوں سے یہ بحث تیز تھی کہ وہ وزیر اعلیٰ کی رہائش گاہ چھوڑنے کے بعد کہاں جائیں گے۔ تازہ خبروں کے مطابق استعفیٰ سے قبل ہی وزیر اعلیٰ کی رہائش گاہ خالی ہونا شروع ہو گئی ہے۔ نتیش کمار کی سرکاری رہائش (1 اَنے مارگ) سے ان کا سامان 7 سرکولر روڈ منتقل کیا جا رہا ہے، جہاں وہ استعفیٰ کے بعد رہیں گے۔

وزیر اعلیٰ نتیش کمار کا سامان 1 اَنے مارگ سے 7 سرکولر روڈ منتقل کیے جانے کی ویڈیو سامنے آئی ہے۔ اس میں دیکھا جا سکتا ہے کہ ایک ٹریکٹر میں ان کا سامان وزیر اعلیٰ کی رہائش گاہ سے نکل کر 7 سرکولر روڈ پہنچا ہے۔ اس سے قبل جب 9 مہینے کے لیے جیتن رام مانجھی وزیر اعلیٰ بنے تھے، تب بھی نتیش کمار اسی رہائش گاہ میں مقیم تھے۔

قابل ذکر ہے کہ بہار کے وزیر اعلیٰ نتیش کمار نے جمعہ کے روز راجیہ سبھا کے رکن کے طور پر حلف لے لیا۔ نائب صدر سی پی رادھاکرشنن نے انہیں ہندی میں حلف دلایا۔ انہوں نے پرانی پارلیمنٹ عمارت، جسے اب ’سمویدھان سدن‘ کہا جاتا ہے، کی طرف اشارہ کرتے ہوئے کہا کہ وہ لوک سبھا کے رکن اور مرکزی وزیر کی حیثیت سے اس عمارت سے وابستہ رہے ہیں اور اب دوبارہ یہاں آ گئے ہیں۔ راجیہ سبھا کی رکنیت کا حلف لینے کے بعد نتیش کمار چاروں ایوانوں کی نمائندگی کرنے والے لیڈر بن گئے ہیں۔ ان سے قبل بہار سے ناگ منی، سشیل کمار مودی، لالو پرساد، اوپیندر کشواہا اور رام کرپال یادو یہ اعزاز حاصل کر چکے ہیں۔