دہلی حکومت پر آلودگی روکنے میں ناکامی کا الزام، 25 کروڑ کا جرمانہ عائد

نئی دہلی: دہلی میں مہلک آلودگی سے نجات دلانے میں ناکام رہی اروند کیجریوال کی حکومت پر نیشنل گرین ٹربیونل (این جی ٹي) نے آج سخت کارروائی کرتے ہوئے 25 کروڑ روپے کا بھاری جرمانہ عائدکیا اور اس کی ادائیگی نہ کرنے پر ہر ماہ دس کروڑ روپے کا اضافی جرمانہ لگے گا۔

این جی ٹی نے دہلی حکومت پر جرمانہ عائد کرتے ہوئے کہا کہ یہ رقم حکومت کے حکام کی تنخواہ میں کٹوتی اور ماحول کو آلودہ کرنے والے لوگوں سے وصولی کی جائے۔ اتھارٹی نے کہا ہے کہ اگر دہلی حکومت جرمانہ ادا نہیں کرتی ہے تو اس پر دس کروڑ روپے ماہانہ اور جرمانہ لگے گا۔

اتھارٹی کے سامنے دارالحکومت میں آلودگی سے متعلق 70 سے زائد عرضیاں ہیں جن پر سماعت چل رہی ہے۔ این جی ٹی نے پایا کہ راجدھانی میں آلودگی کو روکنے کے لئے اس کےاحکامات پر عمل بھی نہیں کیا گیا۔ دہلی میں کھلے میں کوڑے میں آگ لگانے پر مکمل پابندی ہے۔ اس کے باوجود دہلی میں جگہ جگہ کوڑا جلایا جانا عام بات ہے۔

این جی ٹی نے گزشتہ ماہ ہی پنجاب حکومت پر دریا ستلج اور بیاس میں آلودگی پر سخت رویہ اپناتے ہوئے 50 کروڑ روپے کا جرمانہ عائد کیا تھا۔ ضلع گرداس پور میں ایک چینی مل کا شیرا ندی میں بہائے جانے سے بڑی تعداد میں مچھلیاں مر گئی تھیں۔