ممبئی سمیت مہاراشٹر میں نئی ہدایات جاری، 10 جنوری سے رات کا کرفیو، 15 فروری تک تعلیمی ادارے بند

ممبئی: ریاست مہاراشٹرمیں آج کورونا کے پیش نظر نئی گائیڈلائن جاری کی گئی ہیں جس کے مطابق اسکول کالجوں کو 15 فروری تک مکمل طور پر بند کرنے کا فیصلہ کیا گیا ہے۔ دسویں اور بارہویں جماعت کے لئے کوچنگ کا سلسلہ جاری رہے گا، تاہم دیگر جماعتوں کے لئے کوچنگ کو بند رکھنے کی ہدایت دی گئی ہے۔

نئی سرکاری ہدایات کے مطابق سیلون، نجی دفاتر میں گنجائش سے آدھے لوگ ہی جا سکیں گے۔ اس کے علاوہ گارڈن، سوئمنگ پول، میدان، بیوٹی پالر، جِم، اسپا اور سیاحتی مقامات پوری طرح بند رہیں گے۔ رات کا کرفیو 11 بجے سے صبح پانچ بجے تک نافذ رہے گا۔

اطلاع کے مطابق تھیٹر کو 50 فیصدگنجائش کے ساتھ جاری رکھنے کی اجازت رہے گی۔ ہوٹل، ریسٹورنٹ کو بھی 50 فیصد گنجائش کے ساتھ رات دس بجے تک کھولا جا سکتا ہے۔ لوکل ٹرین کی خدمات جاری رہیں گی۔ یہ احکامات 10 جنوری کی شب 12 بجے سے 15 فروری کی رات 12 بجے تک نافذ رہیں گے۔