سونیا گاندھی نے پارٹی کے سرکردہ لیڈروں سے کی ملاقات، ملک میں بڑھتی مہنگائی اور بے روزگاری پر تبادلہ خیال

کانگریس صدر سونیا گاندھی نے ہفتہ کے روز ملک میں بڑھتی مہنگائی اور بے روزگاری کے ساتھ ساتھ حکومت کی پالیسیوں کے خلاف عوامی بیداری مہم اور رابطہ عامہ پروگرام کے دوسرے مرحلہ کے لیے پارٹی کے سرکردہ لیڈروں سے ملاقات کی۔ راجستھان کے ادے پور میں پارٹی کے ’نو سنکلپ چنتن شیویر‘ کے دوسرے دن کانگریس پارٹی کے جنرل سکریٹریز، ریاستی کانگریس کمیٹی کے صدور اور قانون ساز پارٹی کے لیڈروں کی میٹنگ کی سونیا گاندھی نے صدارت کی۔

کانگریس کے سابق صدر راہل گاندھی نے بھی میٹنگ میں عوامی بیداری مہم کے لیے آئندہ مرحلہ کی پالیسی بنانے سے متعلق اپنی بات رکھی۔ اس کے ساتھ ہی میٹنگ میں مرکز کی مودی حکومت کی قیادت میں مہنگائی، ضروری اشیا کی قیمتوں میں اضافہ، معاشی بحران، بے روزگاری شرح اور زرعی بحران سمیت مختلف ایشوز کو عوام کے سامنے لانے کے موضوع پر بات چیت ہوئی۔ اس کے تحت کانگریس اب عوامی بیداری مہم 2.0 شروع کرنے کا منصوبہ بنا رہی ہے۔

واضح رہے کہ کانگریس نے 14 نومبر سے 29 نومبر 2021 تک مہنگائی، معاشی بحران، بے روزگاری شرح اور زرعی بحران سمیت مختلف ایشوز کو عوام کے سامنے لانے کے لیے عوامی بیداری مہم چلائی تھی۔