بی جے پی کو کانگریس کا پیغام، ’نفرت سے نہیں، پیار سے جیتیں گے‘

پارلیمنٹ میں 20 جولائی کو تحریک عدم اعتماد پر بحث کے دوران کانگریس صدر راہل گاندھی کی طرف سے پی ایم مودی کو گلے لگانے پر جہاں بی جے پی مسلسل کانگریس کو نشانہ بنا رہی ہے، وہیں کانگریس نے یہ صاف کر دیا ہے کہ وہ بی جے پی کی نفرت بھری سیاست کو پیار سے جیتیں گے، راہل گاندھی کے بعد ممبئی کانگریس نے یہ پیغام دیا ہے۔ممبئی شہر میں کانگریس کی طرف سے پوسٹر لگائے گئے ہیں، جس میں راہل گاندھی پارلیمنٹ میں پی ایم مودی کو گلے لگاتے ہوئے دکھائی دے رہیں، پوسٹر میں لکھا ہے، ’نفرت سے نہیں، پیار سے جیتیں گے‘۔

پارلیمنٹ میں پی ایم مودی کو گلے لگانے پر جہاں لوگوں کی طرف سے راہل گاندھی کی تعریف کی جا رہی ہے، وہیں مودی، بی جے پی اور اس کے لیڈروں کو یہ بات ہضم نہیں ہوئی ہے، پی ایم مودی سمیت ان کی پارٹی کے رہنما مسلسل راہل گاندھی پر نشانہ سادھ رہے ہیں۔ گلے لگانے کے بعد راہل گاندھی کی پیٹھ تھپتھپانے والے پی ایم مودی نے بھی ہفتہ کو اتر پردیش کے شاہ جہاں پور میں ’کسان ریلی‘ سے خطاب کرتے ہوئے نشانہ لگایا تھا، انہوں نے کہا تھا کہ جب راہل گاندھی تحریک عدم اعتماد لانے کی وجہ نہیں بتا پائے تو وہ میرے گلے پڑ گئے۔