قتل معاملے میں پیش کی گئی نامکمل اسٹیٹس رپورٹ، دہلی پولیس کے کام کاج سے ہائی کورٹ برہم

قتل کیس کے ایک معاملے میں سماعت کے دوران دہلی ہائی کورٹ نے دہلی پولیس کے کام کاج پر سخت برہمی کا اظہار کیا۔ عدالت نے پایا کہ بوانہ تھانے کے اس وقت کے ایس ایچ او کی جانب سے عدالت میں نامکمل اور گمراہ کن اسٹیٹس رپورٹ پیش کی گئی تھی۔ اس معاملے سے متعلق اہم شواہد کو شامل نہیں کیاگیا تھا۔ جسٹس گریش کٹھپالیہ نے اسے انتہائی سنگین اور چونکا دینے والی صورتحال قرار دیا اور متعلقہ افسران کے خلاف کارروائی کی ہدایت دی۔

سماعت کے دوران عدالت نے کہا کہ اس معاملے کی شروعات ایک بلائنڈ ایف آئی آر سے ہوئی تھی۔ یعنی ابتدائی رپورٹ میں کسی ملزم کا نام واضح طور پر نہیں تھا۔ حیرت کی بات یہ ہے کہ جب کیس عدالت میں آیا تو نہ تو تفتیشی افسر موجود تھے اور نہ ہی ایس ایچ او۔ اس سے استغاثہ فریق کو درست طریقے سے اپنا مؤقف پیش کرنے میں مشکل ہوئی۔

عدالت نے یہ بھی نوٹ کیا کہ تفتیشی افسر کی طرف سے داخل کی گئی اسٹیٹس رپورٹ میں آخری منظرکے اہم گواہ کی مکمل گواہی شامل نہیں کی گئی تھی، جو معاملے کے لیے انتہائی ضروری تھی۔ ریکارڈ کے مطابق اہم گواہ کی جزوی گواہی 8 اگست 2024 کو ہوئی تھی۔ اس دن تفتیشی افسرعدالت میں سی سی ٹی وی فوٹیج دکھانے کے لیے لیپ ٹاپ ہی نہیں لائے جس سے گواہی نامکمل رہ گئی۔ بعد ازاں 17 فروری 2025 کو جب عدالت میں سی سی ٹی وی فوٹیج چلائی گئی تو گواہ ملزم کی شناخت نہیں کرسکیں۔

اسٹیٹس رپورٹ میں یہ اہم معلومات بھی چھپائی گئی تھیں۔ جب وکیل دفاع نے اسے عدالت میں پیش کیا تو استغاثہ فریق بھی اس سے انکار نہیں لرپایا۔ عدالت نے کہا کہ ملزم تقریباً 4 سال 8 ماہ سے جیل میں ہے۔ کیس کے حالات اور تفتیش میں سامنے آنے والی کوتاہیوں کو مدنظر رکھتے ہوئے عدالت نے ملزم کو 10ہزار روپے کے ذاتی مچلکے اور اتنی ہی رقم کے ایک ضمانتی پر رہا کرنے کا حکم دیا۔ اس کے ساتھ ہی متعلقہ ڈی سی پی کو ہدایت دی کہ معاملے میں لاپرواہی برتنے والے پولیس افسران کے خلاف مناسب کارروائی کی جائے۔