مانسون کی پیشن گوئی سے خدشات میں اضافہ، معمول سے کم بارش ہونے کا امکان، پیداوار پر پڑے گا اثر

موسم کے اتار چڑھاؤ کے دوران اندازہ لگایا گیا ہے کہ اس سال مانسون کمزور رہے گا۔ دو سال اچھی بارش ہونے کے بعد اس سال معمول سے کم بارش ہونے کی پیشین گوئی نے خدشات میں اضافہ کر دیا ہے کیونکہ ملک کی تقریباً نصف زراعت مانسون پر منحصر ہے۔ دھان، دالوں، تیل کے بیجوں کی بوائی اور پیداوار پر اس کا براہ راست اثر پڑ سکتا ہے۔

ہندوستان کے محکمہ موسمیات (آئی ایم ڈی) نے اپنی پہلی سرکاری پیشن گوئی میں کہا ہے کہ اس سال ملک بھر میں جنوب مغربی مانسون (جون تا ستمبر) کے دوران بارش معمول سے کم (تقریباً 100 سینٹی میٹر) ہونے کا امکان ہے، جو ہندوستان میں موسمی بارش کی طویل مدتی اوسط (ایل پی اے 1920-1971 ) 87 سینٹی میٹر کا تقریباً 92 فیصد ہے۔ ایل پی اے کے 90 سے 95 فیصد کے درمیان بارش کو معمول سے کم سمجھا جاتا ہے۔ نجی ایجنسی اسکائی میٹ نے بھی تقریباً 94 فیصد بارش کی پیش گوئی کی ہے۔

آئی ایم ڈی کے ڈائریکٹر جنرل ڈاکٹر ایم مہاپاترا نے ایک پریس کانفرنس میں کہا کہ مقداری طور پر پورے ملک میں موسمی بارش ایل پی اے کا 92 فیصد رہنے کا امکان ہے جس میں 5 فیصد کے ممکنہ تغیرات ہیں۔ شمال مشرقی، شمال مغربی اور جنوبی جزیرہ نما ہندوستان کے کچھ علاقوں میں معمول سے زیادہ بارش ہونے کی توقع ہے۔ ان کے علاوہ ملک کے باقی حصوں میں معمول سے کم بارش ہونے کا امکان ہے۔ معمول سے کم بارش کی ایک وجہ جون میں بحرالکاہل میں ال نینو حالات کا ابھرنا ہو سکتا ہے۔ عام طور پر جب بھی ال نینو کے حالات پیدا ہوتے ہیں، ہندوستان میں مانسون کمزور پڑ جاتا ہے اور خشک سالی کا خطرہ ہوتا ہے۔ تاہم، بحر ہند میں ایک مثبت ڈوپول آئی اوڈی تیار ہو رہا ہے۔

ڈاکٹر مہاپاترا نے کہا کہ مثبت آئی اوڈی میں معمول سے زیادہ بارش ہوتی ہے اس لئے امید ہے کہ اس سے مانسون کے دوسرے نصف میں ال نینو کے اثرات کو کم کرنے میں مدد ملے گی۔ آئی او ڈی بحر ہند کے مغربی (افریقہ کے ساحل) اور مشرقی (انڈونیشیا کے ساحل) حصوں کے درمیان سمندر کی سطح کے درجہ حرارت میں ایک بے قاعدہ تغیر (تکرار) ہے۔

ہندوستان کی کل بارش کا تقریباً 75 فیصد مون سون کے موسم میں ہوتا ہے، جو آبپاشی، پینے کے پانی اور پن بجلی کی پیداوار کے لیے ضروری ہے۔ تقریباً 64 فیصد ہندوستانی زراعت پر انحصار کرتے ہیں، جو بنیادی طور پر جنوب مغربی مانسون پر منحصر ہے، کیونکہ کل کاشت شدہ رقبہ کا صرف 55 فیصد ہی سینچائی کے تحت آتا ہے۔ مون سون کی بارشیں ملک کے مختلف حصوں میں آبی ذخائر کو بھرنے کے لیے بھی اہم ہے، جو پینے کا پانی فراہم کرتے ہیں۔

کم بارش چاول، دالوں اور تیل کے بیجوں کی بوائی اور پیداوار کو براہ راست متاثر کر سکتی ہے۔ فصل کم ہونے کی صورت میں اشیائے خوردونوش کی قیمتوں میں اضافہ ہوسکتا ہے جس سے مہنگائی کا خدشہ ہے۔ دیہی علاقوں میں آمدنی میں کمی مارکیٹ کی طلب کو کم کر سکتی ہے، جس سے ملک کی جی ڈی پی نمو پر بھی اثر پڑسکتا ہے۔ ان دنوں ملک کے موسم میں واضح تقسیم دیکھی جا رہی ہے۔ ایک طرف شمال مغربی اور وسطی ہندوستان میں درجہ حرارت تیزی سے بڑھ رہا ہے اور کئی ریاستوں میں گرمی کی لہر کے حالات پیدا ہو رہے ہیں، وہیں دوسری طرف شمال مشرقی ہندوستان میں بارش، گرج چمک اور بجلی گرنے کا سلسلہ جاری ہے۔